Bıyl Syr óńirinde «Rýhanııat jyly» bolyp jarııalandy. Ataýly jyl aıasynda ár aýdandaǵy murajaı, muraǵat, kitaphanalar basyn qosatyn «Rýhanııat» ortalyqtary salynady. Olardyń keıbiriniń qurylysy bastalyp ta ketti. Al mádenıet jáne óner qyzmetkerleri kúninde sala ókilderiniń birqatary marapat tórine kóterildi. Saltanatty is-sharaǵa oblys ákimi Nurlybek Nálibaev qatysyp, sala qyzmetkerleri men ardagerlerdi kásibı merekemen quttyqtady.
«Bıylǵy naýryz aıynan bastap aımaǵymyzda «Rýhanııat jyly» jarııalandy. Ataýly jylǵa basty tartý retinde 1000 oryndyq «О́ner ortalyǵy» ashyldy. Halyqaralyq TÚRKSOI uıymynyń sheshimimen bizdiń óńir túrki dúnıesiniń «Eń úzdik mádenı aımaǵy» atalymyn ıelendi. Bul Syr jaǵalaýyndaǵy baıyrǵy jurttyń Orta Azııadaǵy rýhanı, mádenı kemeldengen óńir retinde laıyqty baǵalanýy dep bilemiz», dedi aımaq basshysy.
Ult mádenıetiniń máıegi sanalǵan óńirdegi sala ókilderin qoldaý qadamdary qýantady. Jyl saıyn bilimge qushtar jastarǵa oblys ákiminiń 100 granty tabystalyp keledi. Odan bólek, qabiletti talapkerlerge Qorqyt ata ýnıversıtetiniń «Dástúrli óner» mamandyǵyna oqýǵa qosymsha 10 grant bólinetin bolady. Byltyrdan bastap mádenıet jáne óner salasy maıtalmandarynyń mártebesin kóteretin «Turan» arnaıy syılyǵy taǵaıyndalyp otyr. Saltanatty jıynda bul syılyqtyń bıylǵy ıegerlerine kóp aldynda qurmet kórsetildi. Birqatar azamatqa oblystyń Qurmet gramotasy, Mádenıet jáne aqparat mınıstrliginiń marapattary tabystalyp, 8 óner ujymyna 60 dombyra tartý etildi.
Aldaǵy ýaqytta óńirdiń jazba mádenıetin nasıhattaıtyn «Alash ádebıeti» mýzeıi uıymdastyrylyp, jazba jádigerlerin restavrasııalaýǵa arnalǵan arhıv laboratorııasy iske qosylady.
«Rýhanııat jyly» sheńberinde oblystaǵy 171 mádenıet úıi men klýb «Adal adam» tujyrymdamasy aıasynda qaıta jańǵyrtylyp otyr. Aımaq mádenıetiniń basty brendi – jyraýlyq dástúr ókilderiniń basyn qosqan «Jyraýlar úıi» ashyldy. Osy kóktemde dala dilmary Áıteke bıdiń 380 jyldyǵyna oraı tuńǵysh respýblıkalyq komandalyq aıtys ótkizildi.
«Rýhanııat jyly» aıasynda Syrdarııa ózeniniń sol jaǵalaýynan oblystyq tarıhı-ólketaný mýzeıiniń jańa ǵımaraty boı kótermek. Balalar talabyn ushtaıtyn «Shyǵarmashylyq akademııasy», eki aýdanda «Oqýshylar úıi» men «О́ner mektebi» salynyp jatyr. О́ner kerýenine talaı daryndy qosqan Qazanǵap atyndaǵy Qyzylorda mýzykalyq joǵary kolledjiniń jańa ǵımaraty da sol jaǵalaýdyń sánin keltiretin kún alys emes. Jeti aýdanda mýzeı, kitaphana, arhıv, neke qııý zaly, ardagerler jáne analar, jastar ortalyqtaryn biriktiretin tıptik úlgidegi «Rýhanııat» ortalyqtarynyń irgetasy qalandy.
Memleket basshysynyń Túrkistanda ótken quryltaıda zamanaýı kitaphana jumysyn uıymdastyrý týraly usynysyna sáıkes 1 maýsymnan bastap Á.Tájibaev atyndaǵy oblystyq ámbebap-ǵylymı kitaphana táýlik boıy jumys tártibine kóshedi.
Byltyrǵy jyldyń taǵy bir tabysy – «Saq jaýyngeri» men «Syǵanaq hanshaıymynyń» músinderi. Arheolog-ǵalymdar 20 jyl boıy júrgizgen qazba jumystarynyń nátıjesinde jasalǵan bul jádigerler qataryn bıyl «Túgisken kósemi» men «Jetiasar aqsúıek áıeli» músinderi tolyqtyryp, kúzde Ulttyq mýzeıdegi kórmege qoıylmaq.
Byltyr elordada Astananyń 25 jyldyǵyna oraı «Sulý Syrdan – arý Astanaǵa» atty Qyzylorda oblysynyń óner kúnderi joǵary deńgeıde ótti. Bıyl aımaq ónerpazdary osyndaı saparmen Almaty qalasyna jol tartady. Oblystyń mádenı uıymdar mamandary Italııa, Belarýs elderinde biliktiligin arttyryp keledi. О́zge el ónerimen tanysyp, Eýropadaǵy belgili konserttik zaldardyń ozyq tájirıbesin úırenip júr.
Alda el namysyn qorǵaǵan er Janqoja Nurmuhamedulynyń 250 jyldyǵyna oraı dastan oryndaýshylardyń respýblıkalyq festıvali josparlanyp, Qazaqstannyń Halyq jazýshysy Ábdijámil Nurpeıisovtiń 100 jyldyǵyna oraı «Sońǵy paryz» romany TÚRKSOI uıymynyń qoldaýymen túrik tiline aýdarylyp jatyr.
Osy kúni «О́ner ortalyǵyna» kelgender Ábilhan Qasteevtiń 120 jyldyǵyna oraı uıymdastyrylǵan «Qylqalamda máńgilik el beınesi» atty halyqaralyq sımpozıým qatysýshylarynyń kórmesin tamashalady. Jıyn sońy jergilikti ónerpazdardyń konserttik baǵdarlamasyna ulasty.
Qyzylorda