Pyqyp ata kásipti jalǵastyryp, naryqtyq zamanda kásibi de, násibi de bolǵan dıirmenine táýba etedi. Kún demeı, tún demeı taý bop úıilgen qap-qap dán ataýlyny usaqtap, untaqtap tapqan tabysy qomaqty.
Tek kóresini tyshqandardan kórip-aq baqty... Mine, qazir birer sátke arsyl-gúrsil dıirmenin toqtata qalyp edi, páleketter, tyshqandardy aıtamyn – baǵanadan bergi óz «sharýasyn» kilt doǵaryp, jalmaýyzǵa da jan kerek, bezip barady-aı.
Basynda páleketterge qaqpan quryp kórgen... Qaqpanǵa ilmegen nársesi joq, dán turǵanda, ásirese bıdaı asynyń atasy bolýy kerek, birine de pysqyryp qaramaıdy.
Qaqpannan kúder úzip, bir bilgishtiń deýimen ómirem qaptyrar arnaıy dárisin de seýip kórgen... Onysy az-maz sep bolyp, sál-pál teńkıtkeni bar bolsyn... Bir-eki bıdaı ıesi unymyzdan jaǵymsyz ıis shyǵady dep dikeńdegen soń, is nasyrǵa shappaı turǵanda onysyn múldem tyıyp tastaǵan bolatyn.
E, kezek mysekeńe oıysyp, mysyqtyń eki-úsh túrin asyrap edi... Pálekettiń ata jaýy emes pe, qyrǵıdaı tıdi dese bolady.
Kóp ótpeı «kóbeıý» úrdisi ilgeri ozyp, ózi de kóbeıgish pále – qambada mysyq ataýlydan aınala almaıtyn halge jetti... Kóbeıgeni sonsha, azyǵy tyshqan jetpeı, olardy asyraýda moınyna qosymsha júk boldy.
Kórshilerdiń kúńkil-syńqyl, aryz-shaǵymynan soń qaptaǵan mysyq ataýly basyna pále bolyp jabysyp, amalsyz munyń ata jaýy ıt asyrady.
...E, ıt pen mysyq yryldasyp-qyrqysyp, qıqýy «qyrqa» asyp, ne kerek, ıt pen mysyq aýlaǵyshtardy jaldaýǵa týra keldi... Bulardyń aqysy ıt pen mysyqty asyraǵannan on esege asyp jyǵylyp, tapqan tabysymnyń qomaqty bóligi solarǵa ketti... Jyǵylǵanǵa judyryq, aýlaǵyshtardy ańdıtyn «jan-janýar janashyrlary» ǵaıyptan taıyp kele qalyp, aıda kelip aıyppulyn salyp syǵyp almasy bar ma... Olar oısyratqan aıyppulmen shektelmeı, munyń kásibiniń esigine baqandaı eki aıǵa «qara qulyp» salyp qaqyratty emes pe.
Sondaǵy qulazyp kúńirengeni áli esinen ketpeıdi. Oılap kórse, qaqpany men dárisi maıda-shúıde deıik, mysyqtyń «mıpalaýy», ıttiń «yryń-jyryńy», aýlaǵyshtardyń «aýmaq-saýmaǵy», sońǵy surqııa «jan-janýar janashyrlary» tespeı soryp soryn qaınatqan-aq eken.
Pyqekeń eseńgirep turyp, es jınap, etek-jeńin jınap baryp atakásibin qaıta qolǵa alyp edi, qudaıǵa shúkir, kásibi qalpyna kelip, dıirmeni dúrildep-gúrildep júrip kep bergeni. Pyqyp dıirmen gúrilimen ilese ininen qaıta shyqqan tyshqandarǵa qarap jymıyp qoıyp, ishinen «jazmyshtan ozmysh joq» dep kúbirlep alyp atakásibine qulshyna kiristi.
Berik SADYR