Kúni keshe ǵana Parıj aspanynda qazaqtyń ásem áni men kúmis kúıi kúmbirledi. Eýropa jurty bul joly «Astana sazy» qazaq memlekettik folklorlyq ansambliniń konsertin tamashalap, halqymyzdyń baı murasynan sýsyndap qaıtty.
Qazaq óneriniń keshi Ranelag teatrynda anshlagpen ótip, kelýshilerdiń barlyǵy ansambl konsertin kórýge jınalǵan. Atalǵan ujym Parıj sahnasynda alǵash ret óner kórsetip otyr. Ultymyzdyń tól mýzykasy talǵamy bıik fransýzdar úshin tańsyq emes. Dese de, mundaı erekshe oryndaýdy eshbir jerden estimegenderin aıtady. Kúmbirlegen qońyr kúıler zamanǵa saı jańasha formatta oryndaldy. Ásirese kórermenniń nazaryn ulttyq aspaptar aýdardy. Buryn-sońdy sherter men dańǵyrany estip-kórmegen kórermen uzaq tyńdap, qyzyqtady.
Keshte «Qazaqkonserttiń» solısteri Aızat Qarabek pen Ánel Marabaeva óner kórsetti. Shyǵarmashylyq ujymnyń brendine aınalǵan «Astana sazy» ansambli Parıj tórinde ulttyq ónerdiń ozyq úlgileri men úzdik týyndylaryn usyndy.
Aıta keteıik, atalǵan ansambl qazaqtyń baı murasyn saqtap, qaıta jańǵyrtyp júr. Ártister osy keshte Qurmanǵazy, Táttimbet kúılerimen, Jaıaý Musa men halyq ánderin quıqyljyta shyrqady.
«Eýropalyqtardy tańǵaldyrý ońaı emes. Sondyqtan konsertte barymyzdy saldyq. Parıjge jetý úshin segiz saǵat jol júrip keldik, qaljyrasaq ta, búgingi kesh bárin umyttyrdy», deıdi ansambl múshesi Ánel Marabaeva.
Sondaı-aq Sadjana Murzalıeva da kórermenniń erekshe yqylasyn tebirenispen jetkizdi. «Kórermender bizdi qushaq jaıa qarsy aldy, konsert sońynda uzaq qol soǵyp, jibergisi kelmedi, al ártiske ónege degen qoshemet bolsa jetkilikti», deıdi ol.
«Astana sazynyń» Parıj sahnasyndaǵy alǵashqy qadamy qutty ótti deýge ábden bolady. Bul sózimizdi parıjdik kórermenniń qoshemeti de ańǵartyp turǵany anyq.