Mádenıettiń kóshin alǵa ozdyryp júrgen árbir mamannyń, talant ıesiniń taǵdyr shuǵylasynyń bir paraǵy sán-saltanatymen aıshyqtaldy. Kózdiń nury men kókirektiń jyryn qatar ańǵartqan sol mádenıet salasynyń qyzmetkerleri Bıken Rımova atyndaǵy Taldyqorǵan drama teatrynda ásem ánmen shalqyp, kúımen qalqyǵandaı sezildi. Keıbir ardaqtylar omyraýyna eńbeginiń óteýindeı kóringen tósbelgilerdi taǵynsa, keıbir jerlesterimiz ártúrli marapatqa ıe boldy. Al Jetisý oblysynyń Dánesh Raqyshev atyndaǵy fılarmonııasy úzdik mádenıet mekemesi atanyp, ujymǵa avtokólik syıǵa tartyldy.
Mádenıet jáne óner qyzmetkerleriniń kásibı merekesine oraı ótken saltanatty kesh Abaı Qunanbaıulynyń «Jelsiz túnde jaryq aı» áni men bı kompozısııasynan bastaý aldy. Uly Dalanyń dara oıshylynyń «Sáýleń bolsa keýdeńde» jyry teatr akterleriniń oryndaýynda asqaqtady. Rýhanı saltanatta alǵashqy bolyp sóz alyp, sala qyzmetkerlerin quttyqtaǵan oblys ákiminiń orynbasary Marlen Kólbaev aldymen jánnat meken turǵyndary men mádenıet salasynyń ókilderine oblys basshysynyń ystyq sálemin jetkizdi.
«Mádenıet – qoǵamnyń rýhanı qozǵaýshy kúshi, halyqtyń ortaq ıgiligi. Kez kelgen ult eń aldymen óziniń tól tarıhymen, dástúr-saltymen, órkendi ónerimen álemdik mádenıettiń bir bólshegi bola alady. Bul oraıda Jetisý san ǵasyrlyq tarıhynda óziniń mol mádenı murasymen maqtana alady. Osy rýhanı sabaqtastyqty úzbeı, jańa zamanǵa saı damytý úshin biz bul salaǵa barynsha qoldaý kórsetip kelemiz. Máselen, mádenıet, arhıvter jáne qujattama basqarmasynyń bıylǵy bıýdjeti 15 mlrd teńgege jýyqtap otyr. Osy salada eńbek etetin qyzmetkerler sany 2 100-den asady. О́tken jyly Qaratal aýdany Kálpe aýyldyq Mádenıet úıi, Qaratal tarıhı-ólketaný mýzeıi paıdalanýǵa berildi. Ondaǵan nysanǵa kúrdeli jóndeý júrgizilip, shalǵaı aýyldardaǵy mekemelerdiń materıaldyq-tehnıkalyq bazasy jańartylýda», – degen ol óz kezeginde ótken jyly atqarylǵan isterdi, atalyp ótken mereıtoılardy aıshyqtady.
Sonymen qatar bıylǵy josparǵa da qysqasha toqtalyp ótti. Máselen, bıyl Muhametjan Tynyshpaevtyń 145, Pyshan Jálmendeulynyń 140, Ilııas Jansúgirovtiń 130, Ábilhan Qasteevtiń 120 jyldyqtary aıasynda kórnekti qaıratkerlerdiń ómir joly men shyǵarmashylyǵy keńinen nasıhattalatyn bolady. О́z kezeginde qazaq beıneleý óneriniń atasy sanalǵan Ábilhan Qasteevtiń bıýsti Taldyqorǵan qalasynda ornatylmaq.
«El ıdeologııasy men sanany jańǵyrtý bastamalarynda mádenıet salasynyń alatyn orny erekshe. Bul týraly Memleket basshysy Qasym-Jomart Toqaev: «Qazirgi tańda zııaly qaýymnyń qoǵamdaǵy róli asa mańyzdy. Mádenıet qaıratkerleri halyqqa, eń aldymen, óz týyndylarymen tanymal bolýy kerek, qoǵamǵa, ásirese jastarǵa jol kórsetip, úlgi-ónege bolýy qajet. Jurtymyz zııaly qaýymnan sabyrlyqty, parasattylyqty kútedi», dedi. Shynynda da áleýmettik-ekonomıkalyq, saıası reformalar iske asyrylyp jatqan el ómiriniń jańa kezeńinde zııaly qaýymǵa artylar júk aýqymdy. Halyqtyń rýhanı baılyǵyn eseleýmen qatar qoǵamnyń jańa sapalyq deńgeıge kóterilýine óner adamdarynyń qosatyn úlesi zor», – dep aıryqsha atap ótken Marlen Qapashuly mádenı sala mamandaryn marapattaýǵa kóshti.
Mádenıet jáne aqparat mınıstrliginiń «Eńbek ardageri» tósbelgisimen Dına Nurǵalıeva ájemiz ben teatr maıtalmany Aman Qojabekov marapattaldy. Eseli eńbegin el rýhanııaty úshin baǵyttaǵan 16 jerlesimiz «Mádenıet salasynyń úzdigi» tósbelgisin omyraýynda jarqyratty.
Sol sııaqty jyldaǵy dástúrge saı Mádenıet jáne óner qyzmetkerleri kúnine oraı arnaıy nomınasııalar boıynsha úzdik dep tanylǵan azamattar, mekemeler men óner ujymdary marapattaldy. Atap aıtqanda, Mádenıet úıi qyzmetkerleri arasynan ár aýdan-qaladan jalpy 10 adam úzdik dep tanyldy. Sondaı-aq «Úzdik tehnıkalyq-jabdyqtaý qyzmetkeri», «Úzdik aspapshy», «Úzdik dástúrli ánshi», «Úzdik ánshi», «Úzdik bıshi», «Úzdik teatr artısi», «Úzdik mýzeı qyzmetkeri», «Úzdik kitaphana qyzmetkeri» atalymdarynyń jeńimpazdarynyń esimderi belgili boldy. Sonymen birge «Úzdik halyq teatry» ataǵyn Kóksý aýdandyq Mádenıet úıiniń Muqyry halyq teatry, «Úzdik halyqtyq, úlgili ataǵy bar ujym» atalymyn «Altyn dán» halyqtyq án-bı ansambli, «Úzdik mýzeı» ataǵyn Sh. Ýálıhanov atyndaǵy «Altynemel» memorıaldy mýzeıi, «Úzdik kitaphana» – Taldyqorǵan qalasynyń ortalyqtandyrylǵan kitaphanalar júıesi, «Úzdik Mádenıet úıi» atalymyn Alakól aýdany Qabanbaı aýyldyq Mádenıet úıi jeńip aldy. Atalǵan atalymdardyń barlyǵynyń jeńimpazdaryna arnaıy dıplom men 100 myń teńgeniń sertıfıkaty tabystaldy.
Al aımaqtaǵy «Úzdik oblystyq mádenıet mekemesi» retinde oblystyq D.Raqyshev atyndaǵy fılarmonııa tanylyp, oǵan jeńil avtokóliktiń kilti berildi. Shara barysynda «Eńbek ardageri» tósbelgisimen marapattalǵan «Qurmet» ordeniniń ıegeri Dına Nurǵalıqyzy men «Úzdik dástúrli ánshi» atalymyn jeńip alǵan Beıbit Musaev sóz alyp, ónerin dáriptegen, mádenıetin máýeletken eldiń alar orny qashanda tór ekenin aıshyqtady. Oǵan qosa rýhanııatyna kóńil bólip, ónerpazyn baýlyp, oǵan qamqorlyq jasap, aqsaqaldary men aqjaýlyqty analaryn ardaqtap júrgen oblys basshylaryna, atqaminer azamattarǵa alǵysyn jetkizdi. Kópshilikti tól merekelerimen quttyqtady. Igi is-shara oblystyq D.Raqyshev atyndaǵy fılarmonııasy bastaǵan jetisýlyq óner ujymdarynyń merekelik konsertine ulasty.
Jetisý oblysy