Taǵy bir oqý jyly aıaqtaldy. Bıyl oblys boıynsha 11-synypty 8 240 túlek támámdap, 6–14 mamyr aralyǵynda testileýdiń úshinshi kezeńine qabyldanǵan ótinishke sáıkes olardyń 89,7 paıyzy UBT-ǵa qatysady. Besinshi shildege deıin sozylatyn basty bilim synaǵynda túlekter Qyzylorda qalasy, Aral, Qazaly, Jańaqorǵan aýdandaryndaǵy testileý pýnktterinde test tapsyrady.
Osy oqý jylynda halyqaralyq olımpıadalar men ǵylymı jobalar konkýrsyna 25 oqýshy qatysyp, 16-sy júldeli oryndarǵa ıe bolypty. Jalpy bilim beretin pánder boıynsha prezıdenttik, respýblıkalyq, olımpıada jáne ǵylymı joba konkýrsynyń qorytyndy kezeńine jetken 121 oqýshynyń 30 paıyzy júldeli oryn enshilegen. Alǵash ret aýyl mektepteri úshin arnaıy ótken olımpıadanyń respýblıkalyq kezeńine joldama alǵan 53 oqýshynyń arasynan 26 shákirt júldeger bolyp, oblys respýblıka kóleminde «Úzdik olımpıadalyq komanda» atandy.
Árıne, munyń bári júıeli jumystyń nátıjesi. 2023-2024 oqý jylynda jaratylystaný-matematıkalyq baǵyttaǵy 6 pán boıynsha «Taldysý», «Qambash» olımpıadalar jáne qosymsha bilim berý ortalyqtarynda 6 kezeńde jalpy bilim berý uıymdarynyń 7–10 synyp oqýshylary arasynan 960 bala daıyndyq kýrstarynan ótti.
О́ńirde pedagog mártebesin joǵarylatý jáne shyǵarmashyl muǵalimderdi qoldaý baǵytyndaǵy bastamalar da jemissiz emes. Oqý-aǵartý mınıstrligi uıymdastyrǵan jyl saıynǵy «Úzdik pedagog» respýblıkalyq konkýrsynan 2022 jyly 4 pedagog jeńimpaz atansa, 2023 jyly 5 muǵalim osy ataqqa qol jetkizip, árqaısysy 3 mln teńge kóleminde grant ıelendi.
Bıylǵy oqý jylyn bitiretinder arasynda 11-synypty 8 240 túlek aıaqtap, úlken ómirge qadam basady. Olardyń 589-y «Altyn belgige» úmitker sanalady. Toǵyzynshy synypty «Úzdik attestatqa» aıaqtaýǵa úmitti shákirt sany 2 014 bolyp tur.
Oqý-aǵartý mınıstrligi tarapynan bilim berý uıymdaryndaǵy mektep bitirý is-sharalaryn ótkizýdiń tujyrymdamasyna saı 24 mamyr kúni «Bilimim – Otanyma» 1–10 synyp boıynsha biryńǵaı tárbıe saǵaty ótkizilip, 9, 11 synyp túlekteri «Men. Mektep. Ustaz» atty esse jazdy. Onda óziniń oqyp shyqqan mektebine ystyq yqylasyn, ustazǵa alǵysyn bildirdi. «Mektebim, saǵan myń alǵys!» taqyrybyndaǵy 11-synyp oqýshylaryna arnalǵan is-shara búgin ótti.
Jalpy aımaqta 1–10 synyp aralyǵynda 173 859 oqýshy bar. Osy oqýshylardyń 98 paıyzyn jazǵy tynyǵý lagerlerine jiberip, eńbekpen qamtýǵa barlyq qarjy kózderinen 919,4 mln teńge jumsalady. Oblys kóleminde jazǵy demalysty uıymdastyrýǵa 2 518 pedagog, 38 belsendi stýdent pen 23 erikti tartylady.
Qyzylorda