Integrasııa ıgiligi

Ashhabadta Oljas Bektenovti Túrikmenstan Prezıdenti Serdar Berdimuhamedov qabyldady. Úkimet basshysy Túrikmenstan Prezıdentine Memleket basshysy Qasym-Jomart Toqaevtyń jyly lebizin jetkizdi. Áńgimelesý barysynda ózara qurmetke negizdelgen ekijaqty qarym-qatynastardyń joǵary deńgeıi atap ótildi. Eki el arasyndaǵy taýar aınalymy bir jylda 28%-ǵa artyp, 563 mln dollardy quraǵan. Bıylǵy úsh aıdyń qorytyndysy boıynsha ózara saýda aınalymy 105 mln dollarǵa jetti. Gaz salasyndaǵy yn­ty­maqtastyq, sondaı-aq aýyl sha­rýa­shylyǵy salasyndaǵy bir­les­ken qazaq-túrikmen jobalaryn iske asyrý máseleleri talqylandy.

TMD ÚBK otyrysynda Dos­tastyqtaǵy ózara is-qı­myldyń ózekti máseleleri boıynsha jan-jaqty pikir almasý ótti. Kezdesý nátıjesinde túrli salalardaǵy ıntegrasııalyq baılanystardy odan ári damytýǵa jáne nyǵaıtýǵa baǵyttalǵan qujattar toptamasy qabyldandy.

Úkimetter basshylary ekono­mıkalyq yntymaqtas­tyqtyń baǵyttaryn talqylady. Kólik, energetıka, hımııa ónerkásibi, ekologııa jáne qaýipti qaldyqtarmen jumys isteý, densaýlyq saqtaý, zııatkerlik menshik salasyndaǵy quqyq buzýshylyqtarǵa qarsy is-qımyl jáne basqa da salalardaǵy yntymaqtastyqty damytý bo­ıynsha birqatar másele qaraldy.

Premer-mınıstr Oljas Bektenov taýar nomenklatýrasy men logıstıkanyń tıimdiligin keńeıtý arqyly saýda baılanystaryn nyǵaıtý qajettigin atap ótti. Biregeı tetikterdiń, atap aıtqanda, erkin saýda aımaǵynyń jumys isteýi Dostastyqtyń ekonomıkalyq áleýetin arttyrýǵa múmkindik beredi. Qazaqstan Úkimetiniń basshysy TMD-nyń ınvestısııalyq ekojúıesin jaqsartý máselesine jeke toqtaldy.

TMD-daǵy kólik dálizderin damytýǵa erekshe nazar aýdaryldy. Qazirgi ýaqytta Qazaqstanǵa ákelin­gen ınvestısııanyń jal­py quny 35 mlrd dollardan astam bolatyn tranzıttik trans­kon­tı­nentaldyq marshrýttar jelisi qalyptasty, bul Eýropa men Azııa arasyndaǵy qurlyqtyq tasymaldardyń 80%-nan astamyn el aýmaǵy arqyly júzege asyrý­ǵa múmkindik beredi. Oljas Bek­tenov tıimdi logıstıkalyq tiz­bek­ti qurý úshin tarıftik saıa­sat­ty úılestirý jáne keden­dik rásim­­derdi sıfrlan­dyrý boıyn­sha ózara is-qımyldy kúsheıtý qajet­tigin atap ótti. Son­daı-aq oty­rys barysynda aýyl sharýa­shy­lyǵy salasynda jáne azyq-túlik qaýip­sizdigin qamtamasyz etý máseleleri boıynsha ózara is-qımyldy jedeldetý sharalary qaraldy.

«Biz ekonomıkalyq turǵyda ózin-ózi qamtamasyz etýge qol jetkizýge, eldiń berik «óner­kásiptik negizin» qurýǵa, mańyzdy ınfra­qurylymdy jańartýǵa, agro­ónerkásip keshenin qaıta júk­teýge jáne Qazaqstannyń kólik-logıs­tıkalyq áleýetin tıimdi paı­dalanýǵa múddelimiz. Atalǵan maqsattardy tolyq­qandy is­ke asyrý úshin biz negizgi seriktes­teri­mizben yntymaq­tastyǵy­myz­dy nyǵaıtý mańyzdy ekenine senim­dimiz», dep atap ótti O.Bektenov.

Keńes qorytyndysy bo­ıynsha yntymaqtastyqty odan ári damytýǵa yqpal etetin 11 qujatqa qol qoıyldy. TMD úkimetteri basshylary keńesiniń kelesi otyrysy 7-8 qarashada Reseıdiń Sochı qalasynda ótedi.

Otyrys aıasynda Premer-mınıstr Oljas Bektenov pen Qyr­ǵyzstan Mınıstrler Kabınetiniń tóraǵasy Aqylbek Japarov ekijaqty kezdesý ótkizdi. Kún tár­tibinde Qyrǵyzstan Prezı­denti Sadyr Japarovtyń Qazaq­stanǵa saparynyń qory­tyndy­sy boıynsha saýda-ekonomı­ka­lyq yntymaqtastyqty damytý jónindegi birlesken ýaǵdalas­tyq­tardy iske asyrý máseleleri talqylandy. Úkimetter basshylary eki eldiń memleket basshylary qoıǵan taýar aınalymy kólemin 3 mlrd dollarǵa deıin jetkizý jónindegi jańa mindetti oryndaý jónindegi jumysty tezdetýdi quptady.