Jaıyq ózeniniń sýy Mahambet aýdanynda áli de 10 metrden túspeı tur. Keshe túski mezgilde munda ózen arnasy 1 020 sm-di qurady. Mahambet aýdany jedel shtabynyń úılestirýshisi Alshynbek Muhanǵalıevtiń aıtýynsha, qazir Mahambet pen Sarytoǵaı aýyldaryn jalǵaıtyn jolda baqylaý kúsheıtilip otyr. Polısııa qyzmetkerleri atalǵan joldaǵy qozǵalysty, ásirese, jaıaý júrginshiler men jeńil avtokólikter qaýipsizdigin udaıy qadaǵalaıdy.
«Birneshe kún buryn Jaıyq ózeninen mol sý kelip, Mahambet aýylyna qaýip tóndirgen edi. Soǵan baılanysty, Mahambet pen Sarytoǵaı aýyldary arasyndaǵy jol jabylyp, arnaıy tehnıkalarmen jyryldy. Joldyń uzyndyǵy – 5 shaqyrym. Qazir atalǵan joldyń eki jaǵyna qorǵanys bógeti salynyp, ústine uzyndyǵy 12 metrlik beton plıta qoıyldy. Bul jolmen jaıaý júrginshiler men jeńil kólikterdiń ótýine bolady. Sarytoǵaı aýylynan shyǵatyn ortasha jáne aýyr júk kólikteri «Seıtek» shaıhanasy janyndaǵy aınalma jolmen júredi», dedi A.Muhanǵalıev.
Onyń deregine súıensek, Mahambet aýdanynda Jaıyq ózeniniń jaǵalaýyna ár 300 metr saıyn 27 kezekshilik beketi qoıyldy. Kezekshilikke tótenshe jaǵdaılar salasynyń mamandary men sarbazdar, memlekettik qyzmetkerler men jergilikti turǵyndar tartyldy. Olar aýdandyq jedel shtabqa saǵat saıyn Jaıyq ózenindegi ahýal týraly baıandaıdy.
Keshe Atyraý-Oral tasjolynan osy aýdandaǵy Taldykól aýylyna baratyn joldy tasqyn sý basty. Bul aýylda qalǵan turǵyndar áli de bar.
«Joldy sý basýyna baılanysty aýyl turǵyndarynyń Atyraý qalasymen qatynasyn úzbeý úshin tótenshe jaǵdaılar departamentiniń mamandary qaıyqpen tasymaldaý qyzmetin uıymdastyrdy. Taldykól aýylyna sý basý qaýpi tónip turǵan joq. Aýyldaǵy bógetti qosymsha bekitý jumysy úzilissiz júrgizilip jatyr. Qazir bul aýylda qaýipsizdikti qamtamasyz etýge Qorǵanys mınıstrliginiń áskerı bóliminen 59 sarbaz, Tótenshe jaǵdaılar mınıstrliginiń qurylymynan 17 qyzmetker men arnaıy tehnıkalar jumyldyryldy», dep habarlady oblystyq jedel shtab.
Birneshe kún buryn Taldykól aýylynan 217 turǵyn Atyraý qalasyndaǵy evakýasııa pýnktine kóshirilgen edi. Al 422 adam óz qalaýymen týystarynyń úıine ornalasqan.
Sondaı-aq Atyraý qalasyna Inderbor kentinen qatynaıtyn jol jabyldy. Oblystyq jedel shtabtyń aqparatyna qaraǵanda, Jaıyq ózeniniń sol jaǵalaýyndaǵy bul joldyń jabylýyna tasqyn sýdyń moldyǵy sebep bolyp otyr.
Jaıyq ózeniniń oń jaǵalaýyndaǵy Atyraý-Oral tasjolynyń birneshe bóligi jabyq tur. Naqtylaı aıtqanda, Mahambet aýdanynyń aýmaǵyndaǵy Saraıshyq aýylynyń jáne 71-shaqyrym tusynda shekteý qoıylǵan.
Tasqyn sý Atyraý qalasynyń mańyndaǵy Sokolok kanalynyń bógetin jaryp ketti. Bógettiń buzylýyna tasqyn sýdyń kóptigi men qatty jel áser etken.
«Sokolok kanaly – Jaıyq ózeni arqyly Atyraý qalasyna qaraı aǵyp keletin mol sýdy retteýdiń negizgi tarmaǵy. Qalany tasqyn sýdan qorǵaý úshin kanal boıyndaǵy alǵashqy bógetke ekinshi qorǵanys nysany salyndy. Ekinshi qorǵanys bógetiniń beriktigin qamtamasyz etý maqsatynda topyraq toltyrylǵan qappen nyǵaıtý jumysy júrgizildi. Kanal boıyndaǵy bógettiń bıiktigi Baltyq júıesiniń deńgeıine sáıkes ulǵaıtyldy. Bul ýchaskede táýlik boıy kezekshilik uıymdastyrylyp otyr. Kanaldaǵy buzylǵan bógetti qalpyna keltirý úshin qosymsha tehnıkalar jiberildi», dep habarlady oblystyq jedel shtabtan.
Atyraý oblysy