«Taza Qazaqstan» aksııasynda Ertis-Baıan óńiriniń halqy belsendilik kórsetip otyr. Ár aptada ótkizilgen tazalyq, ekologııalyq is-sharalar aıasynda eldi mekender abattandyryldy. Aksııa barysynda oblystyń eldi mekenderinde jalpy sany 26,7 myń kóshet egilgen.
El úlkenderi men jastar eldi mekenderdi kógaldandyrýǵa jerlesterin shaqyra otyryp, aldaǵy ýaqytta aǵash egý ıgi dástúrge aınalsa degen nıetin jetkizdi. Uıymdastyrýshylardyń aıtýynsha, óńirdegi ekojúıeni jaqsarta túsý osyndaı shaǵyn qadamdardan bastalady.
Alǵashqy aptada «Berekeli ólke» ataýymen kommýnaldyq qyzmetter men uıymdar eldi mekenderdiń aýmaǵyn tazalady. 510 shaqyrym kósheler men trotýarlar retke keltirildi, 3 200-den asa jol belgileri, 669 aıaldama pavılondary jáne 198 baǵdarsham nysandary syrlandy, jol boıyndaǵy 350 qudyqtyń qaqpaǵy qalpyna keltirildi.
Budan soń «Meniń aýlam – meniń baǵym» aptalyǵy boıynsha aýlaishilik aýmaqtar retke keltirildi. 1 340 aýla men balalar oıyn alańdary, 1 168 qoqys konteıneri jáne 2 963 qoqys alańy jınaldy. 189 eskertkish retke keltirildi.
– Bizdiń aımaqtyń turǵyndary «Jasyl aımaq» aptalyǵyna da belsene qatysty. Oblystyń eldi mekenderinde 26,7 myń kóshet otyrǵyzyldy. «Tabıǵatty qorǵaý – adamnyń boryshy» aptalyǵynda ruqsat etilmegen polıgondar men lastanǵan ýchaskeler joıyldy. 32,4 myń tonna qatty turmystyq qaldyqtar shyǵaryldy, – dep atap ótti óńirlik Energetıka jáne turǵyn úı-kommýnaldyq sharýashylyq basqarmasy bólimi basshysynyń mindetin atqarýshy Á.Temirtas.
Pavlodar qalasynyń ákimdiginen habarlaǵandaı, Ertis ózeni jaǵalaýyndaǵy «Qazqonaq» tabıǵı eskertkishi mańynda qaraǵaı men shyrsha aǵashynyń 300 kósheti, Nazarbaev ıntellektýaldyq mektebiniń gúlbaǵynda ártúrli aǵashtardyń 150 danasy egilgen. Al qalanyń jasyl beldeýine, ıaǵnı Fregat-1 baǵbanshylyǵy men «Qazaqstan alıýmınııi» AQ aralyǵyna búginde 4 500 tal otyrǵyzylǵan.
Ekologııalyq aılyqqa barlyǵy oblysta 107 myńnan asa turǵyn, 3,2 myń sharýashylyq júrgizýshi sýbekti, kásiporyndar, memlekettik mekemeler, uıymdar, páter ıeleriniń kooperatıvteri jumyldyrylǵan. Úı aýlalarynan 54,2 myń tonna qoqys shyǵarylǵan. Búgingi tańda qalalar men aýdandardyń merdigerlik uıymdary eldi mekenderdiń sanıtarlyq jaǵdaıyn qoldaý boıynsha jumystardy jalǵastyryp jatyr.
Pavlodar oblysy