Qazaqstan halqy 17 mıllıonnan asty

О́tken jyldyń qorytyndysy boıynsha elimizdegi halyq sany 17 397,2 myń adamdy qurady, sonyń ishinde qalalyqtar – 9 612,6 myń (55,3%), aýyldyqtar 7 784,6 myń adamdy (44,7%) qurap otyr. 2014 jylǵy qańtar-qarashada jalpy elimizde halyq sany 236,4 myń adamǵa nemese 1,38%-ǵa ósti, 2013 jylǵy 1 jeltoqsanmen salystyrǵanda halyq sany 251,5 myń adamǵa nemese 1,47%-ǵa artqan. Bul jóninde Prezıdent ja­nyn­daǵy Ortalyq kommýnıka­sııalar qyzmetinde bolǵan brıfıng barysynda habarlaǵan Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov áleýmettik-ekonomıkalyq qorytyndylarǵa birshama toqtalyp ótti. Onyń aıtýynsha, jyl saıyn jaqsy jaǵynan artyp otyrǵan kórsetkishter barlyq salada kórinis taýyp otyr. Mysaly, AHAJ organdary usyn­ǵan azamattyq hal aktileri jazba­laryndaǵy málimetterdi óńdeý ná­tıjesinde, ótken jyldyń qańtar-qarashasynda týǵandar sany 368,9 myń adamdy qurap, 2013 jylǵy qańtar-qarashaǵa qaraǵanda 5,8 myń adamǵa nemese 1,6%-ǵa artqan. Al qarastyrylyp otyrǵan kezeńde qaıtys bolǵandar sany 120,8 myń adamdy qurap, 2013 jylǵy qańtar-qarashaǵa qaraǵanda 5,9 myń adamǵa nemese 4,7%-ǵa azaıǵandyǵyn málimdedi. Sondaı-aq, Á.Smaıylov eli­miz­degi halyqtyń basym kópshiligin jastar qurap otyrǵandyǵyn naqtylady. Sandyq kórsetkishte 15 jasqa deıingi balalar – 27,3%, al 16 jastan zeınet jasyna deıingi eńbekke jaramdy azamattar 62% bolsa, zeınet jasynan bastap qarııalar – 10,8%, al 14 pen 28 jas aralyǵyndaǵy jastardyń úlesi 25% bolyp otyrǵandyǵyn aıtty. Sonymen qatar, ótken jyldyń qańtar-qarashasynda respýblıka halqynyń tabıǵı ósimi 2013 jyl­dyń qańtar-qarashasymen sa­lys­tyrǵanda 11,6 myń adamǵa nemese 4,9%-ǵa artyp, sandyq kórsetkishi 248,1 myń adamdy quraǵan. Al ekonomıkadaǵy ózgerister boıynsha qysqa merzimdi ekono­mı­kalyq ındıkator 2014 jylǵy qańtar-jeltoqsanda 2013 jylǵy tıisti kezeńmen salystyrǵanda 102,8%-dy qurady. Sondaı-aq, negizgi kapıtalǵa salynǵan ınvestısııa­lar kólemi 6574,7 mlrd. teńgeni qurap, bul kórsetkish 2013 jylǵa qaraǵanda 3,9%-ǵa artty. Al ónerkásip óndirisiniń kólemi qoldanystaǵy baǵalarda 18492,8 mlrd. teńgeni qurasa, bul kórsetkish 2013 jylmen salystyrǵanda 0,2%-ǵa artyq, dedi Á.Smaıylov. Onyń aıtýynsha, aýyl sharýashylyǵy jalpy óniminiń kólemi 2509,9 mlrd. teńgeni qurap, 2013 jylmen salystyrǵanda 0,8%-ǵa artqan. Elmıra MÁTIBAEVA, «Egemen Qazaqstan».