Áıgili «Djıro d’Italııa» kópkúndigi aıaqtaldy. Úsh aptadan asa ýaqytqa sozylatyn dúbirli doda Italııanyń Týrın provınsııasyndaǵy Venarııa-Reale qalasynan bastaý alyp, ejelgi shahar Rımde óz máresine jetti. Sol aralyqta álemniń ár qıyrynan jınalǵan eń úzdik veloshabandozdar 3382,8 shaqyrymdy júrip ótti.
«Djıro d’Italııa» dodasynyń 115 jyldyq tarıhy bar. Atalǵan jarystyń tusaýy sonaý 1909 jyly kesildi. Sodan beri baıraqty báseke 104 márte uıymdastyryldy. Tusaýkeser týrnırde jergilikti sportshy Lýıdjı Ganna top jardy. Eń kóp oljaǵa kenelgen veloshabandozdardyń tizimin ıtalııalyq Alfredo Bında men Andjelo Faýsta Koppı jáne belgııalyq Edýard Merks bastap tur. Bul sańlaqtardyń árqaısysy jalpy esepte bes-bes retten bas júldeni oljalady. Apennın túbeginiń tarlandary HH ǵasyrdyń alǵashqy jartysy men bel ortasynda atoı salsa, Belgııanyń betkeustary 60–70 jyldary aldyna jan salmady.
Qazaqstanda negizi qalanǵan «Astana» veloklýbynyń músheleri «Djıro d’Italııada» úsh márte daralandy. Tarqatyp aıtsaq, 2008 jyly Alberto Kontador qarsylas shydatpasa, 2013 jáne 2016 jyldary Vınsenso Nıbalıge teń keler eshkim tabylmady. Odan bólek, kezeńdik saıystarda top jarǵan saıypqyrandar da bar.
Byltyrǵy jarysta 33 jastaǵy Slovenııanyń sańlaǵy Prımoj Roglıch («Jumbo-Vista») jeńimpaz atandy. Ekinshi oryndy ulybrıtanııalyq Geraınt Haýell Tomas («Ineos Grenadiers») ıelense, portýgalııalyq Jýan Pedrý Almeıda («UAE Team Emirates») úzdik úshtikti túıindedi. Jalpy esepte «Astananyń» arlandary jaqsy nátıje kórsete almady. Bir qýantarlyǵy, elimizde jasaqtalǵan komanda sapyndaǵy ulybrıtanııalyq sprınter Mark Kavendısh eń sońǵy 21 kezeńde máre syzyǵyn birinshi bolyp qıyp ótti.
Bıyl «Djıro d’Italııa» kópkúndiginde «Astananyń» namysyn Alekseı Lýsenko, Sımone Velasko, Henok Mýlıýbyrhan, Krıstıan Skaronı, Vadım Pronskıı, Lorenso Fortýnato, Davıde Ballerını, Maks Kanter syndy veloshabandozdar qorǵady. Solardyń arasynan úzdik kórsetkishke Fortýnato qol jetkizdi. 28 jastaǵy ıtalııalyq legıoner jalpy esepte 12-oryndy ıelendi. О́zge sportshylardyń kórsetkishteri odan da tómen. Al bıylǵy doda Slovenııanyń saıypqyrany Tadeı Pogachardyń («UAE Team Emirates») jeńisimen aıaqtaldy. Jeńimpazdyń ýaqyty – 79:14:03. Kolýmbııalyq Danıel Felıpe Martınes («BORA – hansgrohe») pen ulybrıtanııalyq Geraınt Tomas («INEOS Grenadiers») ekinshi jáne úshinshi oryndardy ózara bólisti.