Antonovka – ilki zamanda tyńgerler qonystanǵan, etek-jeńi keń pishilgen aýyl. Buryn sap-sary bolyp turatyn. Keıingi jyldary óńi ózgerdi. Tóńirektegi shaǵyn aýyldyń adamdary kóship kelip jatyr. Sebep, qara joldyń boıyna qonystanǵan. Aýyldy qaq jaryp ótetin qara joldyń boıynda qysy-jazy saýdasy júrip jatady. Negizinen kartop, kókónis, qaz-úırek satady. Nápaqasyn osy jaıaý saýdadan aıyryp turǵandardyń arasynan jergilikti ult ókilin emge taba almaısyz.
Aýylǵa kire beriste, jazyq dalanyń ústinde dop qýalap júrgender kózge shalyndy. Áýeli bala eken degenbiz, sóıtsek, 25-30-daǵy tepse temir úzetin jigitter. Oıynshylardyń ústinen tónip, urandap turǵandar qanshama. Bul ýaqytta aýyl adamdary bir qoly eki ete almaı jantalasyp jatýshy edi. Qazir jaıbaraqat.
Uly naǵashymyzdyń jyldyq asyna kelgenbiz. As iship bolǵan soń keler-keteri joq qysyr áńgime bastaldy. Aıtýlaryna qaraǵanda, qystan qysylyp shyqqan. Ásirese jylqy maly. Qara kúzde-aq kóteremge aınalsa kerek. Bıylǵy qys ta ońaı bolmady. Ásirese qalada turyp, aýylda jylqy ustaıtyndar qınalyp qaldy. Jylqyshy mal ıesine habar berip, «keýdesinde jany bardy alyp ketińder» degenimen, qalada turatyn beıbaq qaıda aparyp baqpaq? Bıyl jylqyshy da taba almaı qalypty. Qazir ózbekter kelip baǵyp jatyr eken.
– Bir bas jylqyǵa bes myń teńge alady, – dedi Qaıdar aǵa, – aýylda 400-diń ústinde qylquıryqty bar. Sonda aı saıyn eki mıllıon teńge ózekeńderdiń qaltasyna túsip tur-aý.
– О́zderińiz nege baqpaısyzdar, – dep suradyq, biz, – álde adam joq pa?
– Aýylda eki qolyn qaıda syıǵyzaryn bilmeı júrgender tolyp jatyr, júr ǵoı áne, dop qýyp, – dedi Qaıdar aǵa, – qaryna quryq ilip, jylqy baqqysy kelmeıdi.
Tórde otyrǵan Ábý aqsaqal ózbek balasynyń ólermendigine tamsanǵan. Jylqyshy ózbekter kúndiz támam jylqyny sharbaqqa qamap tastap, aýyl adamdarynyń úılerin sylap-syrlap, qoralaryn jóndep berip, qarajat tabady eken. Bes balasy bar Ábekeń de kartop ektirip almaqshy. О́ziniń aıtýyna qaraǵanda, jer jaǵdaıyn jaqsy biletin ózekeńder ekse, shyǵymy jaqsy bolýy múmkin.
– Jyl saıyn egip júrmiz ǵoı, – degen Ábý aqsaqal, – byltyr da ektim. Eki qap tuqym. Kúzde eki qap aldym. Shyǵyn joq.
– Kúzde kórgenmin, – degen kórshisi myrs etip, – qaısy kartop, qaısysy aramshóp ekendigin adam aıyryp bolmaıdy.
Qaıran, qazaqtyń tirligi-aı!..