Arnaıy kıim tigetin kásiporyn

Sońǵy jyldary munda oń ózgeris bolyp, kásiporyn tolyq qýatyna shyqqany baıqalady. JShS basshylyǵy eńbek ujymynyń jetistigin memleket qoldaýynyń nátıjesi dep biledi. Búginde munda birneshe seh qaıta jabdyqtalyp, 50-den astam tiginshi túrli kásiporyn qyzmetkerlerine jumys kıimin tigip jatyr. Kompanııa basshysy Danııar Alpysbaev qazirgi tigin sehyn kezinde Pavlodar qalasynyń irgesindegi shaǵyn úı-jaıdy jaldap, tiginshilikpen aınalysatyn 10 mamannan bastaǵanyn jetkizdi. 

– Búginde biz Pavlodar oblysynyń iri ónerkásiptik kásiporyndarymen jumys isteımiz. Astana jáne Batys Qazaqstan kompanııalarymen yntymaqtastyq ornattyq. Budan bólek, memlekettik satyp alýlarǵa jetkizýshi kompanııa retinde qatysamyz. Keıingi jyldary jumysymyzda oń ózgerister bolyp, seh tolyq qýatynda jumys isteı bas­tady. Memlekettik qoldaý ar­qy­ly qomaqty nesıege qol jet­kizdik. Atap aıtqanda, biz «Damý» qory arqyly 2020 jyly banktik nesıeler boıynsha sýbsıdııalanǵan paıyzdyq mól­sherlemelerdi paıdalanyp, aınalym qarajatyn to­­lyqtyrdyq. О́tken jyly qor­dan birden 108 mıllıon teńgege kepildik aldyq. Osynyń nátıjesinde ónimimizdiń ózin­dik quny aıtarlyqtaı tómen­dep, Reseı, Qyrǵyzstan, Qytaı óndirýshilerimen báse­ke­ge túse alamyz. Alpaýyt kásiporyndardan aýqymdy tapsyrystar tússe de, barly­ǵyn ýaqtyly ári sapaly oryn­daýǵa múmkindik bar. Tigin sehy alǵashqyda tek arnaıy jumys kıimderin tigetin, qa­zir aıaqkıim, kaska, barlyq qor­ǵanys quralyna tapsyrys qabyldaımyz, – dedi D.Alpysbaev.

Aıta keteıik, kásiporyn 2002 jyly qurylǵan. Búginde arnaıy jumys kıimi men aıaqkıim, jeke qorǵanys quraldary na­ry­ǵynda aımaqta kóshbasshy bolyp otyr. Tigin sehynda ónimderdi daıyndaý úderisi zamanaýı jabdyqta júzege asyrylady. Barlyq daıyn ónim belgilengen sapa standarttaryna sáıkes «ST-KZ» sertıfıkatymen resimdelgen.

Byltyr bıznes nysany 300 mln teńgeniń ónimin shyǵarǵan. Turaqty tutynýshylaryna úne­mi jeńildik jasap, ónim as­sor­tımentin keńeıtýge de talpynyp otyr.

Pavlodar oblysy