«Taza Qazaqstan» ekologııalyq aksııasy aımaǵymyzda aıtarlyqtaı sıpat aldy. Aýdan, qala, aýyldaǵy aǵaıyn ıgilikti iske bir kisideı atsalysyp jatyr. Ásirese Shet aýdanynyń Taldy aýylynda turatyn 72 jastaǵy Rymtaı ájeı Ábenqyzynyń kók traktoryn tizgindep, qys boıǵy jınalǵan kúl-qoqysty syrtqa tegin tasyp berýi – tańǵaldyratyn jaıt.
Jasy jetpisten assa da, traktorǵa, úı men túzdiń sharýasyna ájeı áli tyń. Eńbek jolyn mehanızator bolyp bastaǵan ájeıdiń kók traktoryna degen qurmeti erekshe. Aýyl ákimi dızel otynyn quıyp berse boldy, kez kelgen ótinishin jerge qaldyrmaıdy. Kók shyqqaly beri respýblıkalyq eko-aksııanyń belortasynda júr. Traktorynyń júk tasıtyn tirkemesimen kúl-qoqysty aýyl shetindegi polıgonǵa tasyp berdi.
Buǵan qosa Rymtaı ájeı – aýyl turǵyndary arasynda ótetin «Taza aýla» baıqaýynyń jyl saıynǵy jeńimpazy. Qar erigen bette aýlasyn elden buryn tazartyp qoıatyny – aýylǵa degen qurmeti, tabıǵatqa degen janashyrlyǵy.
– Rymtaı ájeı – aýyldyń qadirli anasy. Aýylǵa tilekshi, janashyr jan. Eńbekke erte jasynan aralasqan. Tynym tappaıdy. Dalanyń sharýasynda da ózi júredi. Aýyldan tehnıka tabylmaı qalyp jatsa, birden Rymtaı ájeıdiń kómegine júginemiz. Janar-jaǵarmaıyn quıyp beremiz. Kók traktorymen kóp sharýamyzdy bitirip beredi. Mine, bir aıdan asty, ekologııalyq senbilikke eńbegin sińirip júr. Qysy-jazy kómegin aıamaıdy, eńbegin puldamaıdy. Osyndaı úlkenderimiz bar kezde aýyldyń bereke-birligi arta túsedi, – deıdi aýyl ákimi Nurlan Abjanov.
Rymtaı Ábenqyzy – Aqshataý aýylynyń týmasy. Eń alǵash 19 jasynda jumysqa mehanızator bolyp ornalasqan ol Taldy aýylynda traktorymen jer jyrtyp, shóp shaýyp, mal bordaqylaý alańdarynda eńbek etken.
Rymtaı ájeıdiń kúıeýi Ǵazız Imanbekov te mehanızıtor bolypty. Olar qyrda birge jarysyp eńbek etken. Bul týraly keıipkerimiz esteliginde bylaı deıdi.
– Úıden shyǵarda ekeýmiz eki traktormen qyrǵa qaraı jarysyp baratynbyz. Degenmen menen ozyp ketse, alańdap artyna qaraılap qoıatyn edi. Jaz boıy eki traktormen qatar júrip, shóp shabatyn edik. Kúz kelgende qoıshylardy kóshiremiz. Tehnıka bolǵan soń, buzylmaı qoımaıdy. Toqtaı qalyp, saıman-saýytymyzdy alyp shyǵyp, jóndeýge kirisip ketetin edik. Kúıeýim eńbekten qashpaıtyn edi. Barlyǵyn adal ári taza isteıtin, – deıdi asyl ájeı.
Rymtaı Ábenqyzy taǵdyr synaǵyna synbady. Temirdeı tózimdilik tanytty. Qudaı bergen eki uly, artynsha asyl jary dúnıeden ozdy. Biraq moıymady. Ishindegi qaıǵy-muńyn eńbekke jumsady. Erik-jigerin tiktedi. Qazir eki qyzy, alty nemeresiniń tileýin tilep otyr.
Aýyl anasy qara jumysty talǵamaıdy. Bir kezderi qurylysqa da qatysyp, aýyldaǵy úılerdi jóndegen. Túzdiń kez kelgen sharýasy áli de qolynan keledi.
Áldi ájeı bir kezderi bozkilemde de beldesken. Shet aýdanynyń 80 jyldyq mereıtoıynda áıelder arasyndaǵy kúreske qatysyp, aýyr salmaq dárejesinde óziniń 58 kılo salmaǵymen biraz qarsylasynyń jaýyrynyn jerge tıgizgenin el-jurt áli kúnge deıin ańyz etip aıtady.
Eńbek adamy Rymtaı Ábenqyzy depýtat ta bolǵan. Halyq qalaýlysy retinde Aqshataý aýlyna qatynaıtyn joldyń salynýyna úlesin qosqan.
Asyl ájeıdiń mynadaı paıymy bar: «Aýyldy túletý – ultty uly etý». Sóz sońynda osyny boıtumar etip alǵan aýyl anasynyń ǵumyry uzaq bolsyn demekpiz.
Qaraǵandy oblysy