Bıyl Soltústik Qazaqstan oblysynda mektepke deıingi, orta jáne kásibı bilim beretin 700 mekeme oqý jylyn aıaqtady. Olarda oqıtyn 100 myńnan artyq tárbıelenýshi men oqýshy jazǵy demalysqa shyqty.
Bilim basqarmasy basshysynyń mindetin atqarýshy T.Protopopovanyń aıtýyna qaraǵanda mamyrdyń 24-de barlyq mektepte «Bilimim – Otanyma!» atty jalpyrespýblıkalyq synyp saǵaty ótti. Synyp saǵatynda 2023-2024 jyldardaǵy oqý jylyn qorytyndylady. Osy kúni 9 jáne 11-synyp oqýshylaryna «Men. Mektep. Ustaz» taqyrybyna balalyqtan eresek ómirge ótý týraly óziniń oıyn esse túrinde jazý usynyldy. Al 25 mamyrda 11-synypty bitiretin oqýshylarǵa arnalǵan «Mektebim, saǵan myń alǵys!» atty saltanatty shara ótkizildi. «Maqsaty – eresek ómirdegi jas azamattyń bolashaqtaǵy jaýapkershiligin sezindirý. Sonymen birge mektepte alǵan bilimin Otan ıgiligine jumsaýdyń joldaryn talqylaý», deıdi Tatıana Nıkolaevna.
Tórtinshi toqsandy oblystyń 58 mektebindegi 33,5 myń oqýshy sý tasqynynyń sebebinen alystan oqytý formatynda ótkizdi. Sonyń ishinde Qyzyljar aýdanynyń 4 jáne Petropavl qalasynyń 3 mektebindegi jaǵdaı aýyr boldy. Sondyqtan bul mektepterdiń oqýshylary BJB jáne TJB-dan bosatyldy. Al bilim mınıstrligi oblystaǵy 5 mekteptiń 754 oqýshysyn emtıhandardan da bosatty. «Árıne, bilim sapasy bizdiń eń basty basymdyǵymyz. Sondyqtan barlyq mektepterde 27-31 mamyr men 26-30 tamyz aralyǵynda Jazǵy mektepter uıymdastyrylady. Bul oqýshylardyń sabaqty bosatqan ýaqyttaryndaǵy baǵdarlamany ıgerýine kómektesedi dep otyrmyz», dedi T.Protopopova.
Bıyl qaı tilde bilim alǵanyna qaramaı barlyq mektepterdiń 5-8 jáne 10-synyp oqýshylary qazaq tilinen emtıhan tapsyrady. Bul Soltústik Qazaqstan oblysynda 27-31 mamyr aralyǵynda 33 myńnan artyq oqýshy qazaq tilinen emtıhan tapsyrady. Qazir oblysta 109 qazaq, 105 aralas jáne 244 orys tilinde oqytatyn mektep bar.
Bıyl oblysta negizgi mektep kýrsyn (9-synypty) 6 972 oqýshy bitirip, 29 mamyr men 10 maýsym aralyǵynda 4 pánnen jazbasha emtıhan tapsyrady. Onyń úsheýi mindetti pánder, bireýin oqýshy óziniń tańdaýymen tapsyrady. Sonyń ishinde, 29 mamyrda qazaq nemese orys tiliniń qaısynda oqýyna baılanysty sol tilde esse jazylady. 3 maýsymda matematıkadan baqylaý, 6 maýsymda oryssha oqyǵandar qazaq tilinen, qazaqsha oqyǵandar orys tilinen jazbasha jumys jazady. Qazaqsha oqyǵandardy orys tilinen synǵa salmasa da bolar edi dep oılaımyz.
О́ziniń qalaýynsha fızıka, hımııa, bıologııa nemese t.b. birinen óz qalaýynsha tapsyratyn sońǵy emtıhandy 9-synypty bitirýshiler 10 maýsymda tapsyrady.
Al mektep bitiretin 3 331 oqýshy 28 mamyr men 11 maýsym aralyǵynda bes sabaqtan emtıhan tapsyrady. Munda da orys tili memlekettik tilmen jaǵalasyp, barlyq jerde birdeı tapsyrylady.
Oblysta 11-synyp bitiretinder arasynan 85 túlek «Altyn belgiden», 177 túlek úzdik attestattan úmitker. 9-synyp bitiretinder arasynan 382 oqýshy da úzdik attestat alýǵa úmittenip otyr. Osy negizgi mektepti bitirgender 31 tamyzǵa deıin ózderin 10-synypqa qaldyrýdy surap ótinish jazýǵa tıisti, al mundaı ótinish jazǵysy kelmegender kolledjderge emtıhansyz qabyldana alady.
Bıyl jazǵy Ulttyq biryńǵaı testileý oblysta tasqyn sý kesirinen jyldaǵydan kesh bastaldy. Oǵan ótinish qabyldaý respýblıkanyń basqa mektepterimen qatar 6 mamyrda bastalǵanymen alty kúnge artyq ýaqyt berilip, 20 mamyrda aıaqtaldy. UBT tapsyrýǵa nıet bildirgender oblysta 25 mamyrda kirisip, 12 shildede aıaqtaıdy. Al basqa oblystar UBT-ny 5 shildede támamdaıdy. Bıylǵy UBT-nyń ereksheligi sol, eger jazǵy UBT-da túlek tómengi upaı alyp qalsa, onda qańtardaǵy nemese naýryzdaǵy nátıje esepke alynady. Oblysta UBT tapsyrý úshin eki ortalyq uıymdastyrylǵan. Onyń birinshisi – Petropavl qalasynda, ekinshisi – Ǵ.Músirepov aýdanynyń ortalyǵy Novoıshımka selosynda.
Oblystyń bilim basqarmasy oqýshylardyń jazǵy demalysyn tıimdi ótkizý joldaryn da josparlap qoıǵan. 90 kúnge sozylatyn demalysta bul sharalar barlyq oqýshynyń 94,2 paıyzyn qamtıdy.
Balalarǵa arnalǵan mektep aýlasynda 204 jáne 253 beıimdelgen alańdar jumys isteıtin bolady. 50 myńǵa jýyq oqýshy 27 shatyr men 7 kıiz úıde dem alady. Balalardyń turǵylyqty jerlerinde 30 uıym men 25 aýlalyq klýb jumys isteıdi. Mektep oqýshylarynyń saraıynda 2 myńdaı balany qamtyǵan Jazǵy akademııa uıymdastyrylady. Qalanyń syrtyndaǵy demalys lagerlerinde árbir maýsymda 6 myń baladan tynyǵady. Qazir olar balalardy qarsy alýǵa daıyndalyp jatyr. Alǵashqy kelýshiler 10 maýsymnan qabyldanady.
Soltústik Qazaqstan oblysy