Elimizdegi mektepterde emtıhandar bastaldy. Oqýshylardyń oqý jyly aıaqtalǵan soń tapsyratyny – aralyq jáne qorytyndy emtıhandar. Atalǵan emtıhandar 11 maýsymǵa deıin jalǵasady. Al kolledj túlekterin qorytyndy attestattaý 28 maýsymǵa deıin júrgiziledi.
Oqý-aǵartý mınıstrliginiń taratqan aqparatyna súıensek, 29 mamyr men 10 maýsym aralaǵynda 9-synypty bitirýshiler úshin qorytyndy emtıhandar ótedi. Al 11-synypty bitirýshiler qorytyndy emtıhandardy 28 mamyr men 11 maýsym aralyǵynda tapsyrady.
Qoǵamda qyzý talqylanyp, eldi eleń etkizgen jańalyqtyń biri bıyl alǵash ret 5-8, 10-synyptarda qazaq tilin meńgerý deńgeıin baǵalaý maqsatynda qazaq jáne basqa da oqytý tilderi bar mektepter úshin qazaq tili boıynsha aralyq emtıhandar ótkiziledi. Bul jańa talap oqýshylardyń qaı tilde bilim beretin mektepte oqıtynyna qaramastan, kelesi synypqa ótý úshin qazaq tilinen emtıhan tapsyratynyn bildiredi. Memlekettik tilden 5-8,10-synyptardyń oqýshylary tapsyratyn emtıhan 31 mamyrǵa deıin ótedi. Emtıhannyń naqty ýaqytyn oqý ordalary ózderi belgileıdi. Emtıhan eki bólikten turady: jazbasha jáne aýyzsha. Oqýshylar esse jazady, sondaı-aq mátindi oqý, áńgimelesý jáne mátindi tyńdap túsiný boıynsha óz sheberligin kórsetedi.
Osyǵan deıin habarlaǵanymyzdaı, Premer-mınıstrdiń tapsyrmasyna sáıkes jáne sý tasqynynan tótenshe jaǵdaı jarııalanýyna baılanysty Atyraý (20 mektep), Aqtóbe (9 mektep), Soltústik Qazaqstan (5 mektep) oblystarynyń 3 581 oqýshysy aralyq jáne qorytyndy emtıhandardan bosatylady. Qorytyndy baǵa olarǵa jyldyq baǵalar retinde qoıylady.
Qorytyndy attestasııany barlyǵy 340 myńnan asa 9-synypty bitirýshi, sondaı-aq bıyl 11-synypty támamdaıtyn 186 myń oqýshy tapsyrady. Mektep túlekterine attestattardy saltanatty túrde tapsyrý 12-15 maýsym aralyǵynda ótedi. Al 156 myń tehnıkalyq jáne kásiptik bilim berý uıymdaryn bitirýshiler úshin qorytyndy attestattaý 28 maýsymǵa deıin júrgiziledi, olarǵa dıplom tapsyrý rásimi 28 maýsym men 1 shilde aralyǵynda bolady.