Radıoelektronıka jáne baılanys áskerı-ınjenerlik ınstıtýtynda tyl komandırleri orynbasarlarynyń, Qurlyq áskerleri, Áýe qorǵanysy kúshteri áskerı bólimderiniń, Desanttyq-shabýyldaý áskerleriniń tylmen qamtamasyz etý qyzmetteri men qoımalar bastyqtarynyń qatysýymen oqý-ádistemelik sabaqtar ótti.
Jıynnyń maqsaty – áskerlerdi jan-jaqty qamtamasyz etýge baǵyttalǵan basqarý úderisteriniń tıimdiligi táýeldi tyl qyzmetkerleriniń kásibılik deńgeıin arttyrý.
Jıyndy basqarǵan Áýe qorǵanysy kúshteri áýe shabýylyna qarsy qorǵanys áskerleri qolbasshysynyń tyl jónindegi orynbasary, polkovnık Asylhan Taýbaev osy sala áskerı qyzmetshileriniń qajetti bilim men daǵdylardy meńgerýi mańyzdy dep atap ótti.
– Áskerdi tyldyq qamtamasyz etý úderisteriniń sapasy áskerı qyzmetshilerdiń jaýyngerlik qabilettiligi men moraldyq rýhyna tikeleı áser etedi. Bul iste qyzmettiń ereksheligin tereń bilý jáne júıeli jumys isteý mańyzdy, oǵan mundaı jıyndar yqpal etedi, – dep atap ótti A.Taýbaev.
Jıyn baǵdarlamasyna dárister, kórneki jáne nusqaýlyq sabaqtar, oǵan qosa rota sharýashylyǵyn júrgizý boıynsha praktıkalyq jattyǵýlar kirdi. Qatysýshylar azyq-túlikti, tehnıkany, qyzmet múlkin saqtaý, odan basqa sarbazdar men kýrsanttardy teńgerimdi jáne salaýatty taǵam mólsherimen qamtamasyz etý máselelerin talqylady. Áskerı qyzmetshilerdiń turmystyq ahýalyn uıymdastyrýǵa da jan-jaqty toqtaldy. Mamandar tájirıbelerimen bólisip, áskerı bólimderde turmys jaǵdaıyn jaqsartýdyń jáne tamaqtanýdy uıymdastyrýdyń tıimdi tásilderin usyndy.
Jıyn barysynda alynǵan bilim men daǵdylar bólimshelerge júktelgen mindetterdi oryndaýdyń jalpy tıimdiligi men daıyndyǵyn arttyrýǵa yqpal etetin bolady.