Premer-mınıstr Oljas Bektenov «Túrkistan qalasynyń erekshe mártebesi týraly» zań jobasyn Parlament Májilisiniń qaraýyna engizý týraly qaýlyǵa qol qoıdy, dep jazady Egemen.kz.
Zań jobasy Memleket basshysynyń Túrkistan oblysyna jumys sapary barysynda bergen tapsyrmalaryn iske asyrý maqsatynda ázirlengen.
Qujat Túrkistan Qazaqstannyń rýhanı-mádenı jáne tarıhı ortalyǵy retinde qalyptasýy men damýy, sondaı-aq onyń memlekettik mańyzyn tanýdyń quqyqtyq negizderin belgileıdi.
Zań qabyldanýy qalanyń tarıhı-mádenı mańyzy bar eskertkishteri men obektilerin, onyń ishinde, Qoja Ahmet Iаsaýı kesenesiniń búkilálemdik mura obektisi retindegi qorǵaý aýmaǵynda ornalasqan eskertkishterdi basqarýdyń, saqtaýdyń, olardyń tutastyǵyn qoldaýdyń ońtaıly júıesin qurýǵa múmkindik beredi. Budan bólek, kesene aýmaǵynda ǵylymı arheologııalyq zertteýler men ǵylymı-restavrasııalaý jumystaryn josparlaý men basqarýǵa múmkindik jasaıdy.
«Sondaı-aq zań jobasy mádenı murany saqtaý jáne jańǵyrtý, dástúrli qolónerdi damytýdy, Túrkistan qalasyn rýhanı-mádenı, tarıhı jáne týrıstik ortalyq retinde damytý jáne ilgeriletýdi kózdeıdi.
Qoja Ahmet Iаsaýı kesenesiniń biregeıligin saqtaý, onyń aınalasynda bóten qurylys elementterine, kóshe jelilerin ózgertýge jol bermeý maqsatynda tarıhı ortalyqtyń qurylysyn retteý aımaǵynda bıiktigi 7 metrden asatyn, sondaı-aq tarıhı eskertkishtermen aýqymy, túsi jáne qurylys materıaldarymen úılespeıtin obektilerdiń qurylysyna jol berilmeıdi», delingen Úkimet habarlamasynda.
Qujat sheńberinde Túrkistan qalasynyń tarıhı-mádenı mura obektilerin saqtaý jáne qorǵaý úshin árbir obektige tarıhı-mádenı mura obektilerin qorǵaý jáne paıdalaný salasyndaǵy qorǵaý aımaqtary belgilenedi. Budan bólek, qalanyń bas josparyna engiziletin tarıhı-sáýlet tirek josparlary men tarıhı-mádenı mura obektileriniń tıisti jergilikti jerdiń karta-shemalary jasalady.
Zań qabyldanǵanda qala aýmaǵynda tarıhı-mádenı mura obektilerine qaýip tóndiretin qurylys, sharýashylyq qyzmetti júrgizýge tyıym salynady.
Arheologııa eskertkishteriniń tutastyǵyn, túpnusqalyǵyn, qundylyǵyn bolashaq urpaq úshin saqtaý maqsatynda Túrkistan qalasynyń arheologııa eskertkishteriniń rezervaty qurylady. Arheologııa eskertkishteriniń rezervatyna engizilgen eskertkishterge qatysty qorǵaý saıasaty arheologııa eskertkishin turaqty ınspeksııalaý, ony aldyn ala kútim jasaý jáne ony qoldaý baǵdarlamalaryn paıdalanýǵa negizdeledi.
«Zań jobasy Túrkistan qalasynyń Qazaqstan Respýblıkasynyń rýhanı-mádenı jáne tarıhı ortalyǵy retinde damýyn qamtamasyz etýge múmkindik beretin tıimdi ınstıtýsıonaldyq orta qurý úshin ýákiletti organdardyń, sondaı-aq jergilikti ókildi jáne atqarýshy organdardyń quzyretterin keńeıtýge baǵyttalǵan.
Zań jobasy sheńberinde jer paıdalaný quqyǵyn berý, týrıstik qyzmetti júzege asyrý, Túrkistan qalasynyń arheologııa eskertkishteriniń rezervatyn qalyptastyrý jáne basqa da máseleler boıynsha qosymsha quzyretter berý usynylady», delingen Úkimet habarlamasynda.
Eske sala keteıik, 2021 jyly Túrkitildes memleketterdiń yntymaqtastyq keńesiniń beıresmı sammıtiniń qorytyndysy boıynsha Túrkistan qalasyn túrki áleminiń rýhanı astanasy dep taný týraly sheshim qabyldanǵan bolatyn.