Senat Spıkeri Máýlen Áshimbaevtyń tóraǵalyǵymen ótken Palata otyrysynda birneshe zań qaralyp, maquldandy, dep habarlaıdy Egemen.kz Senattyń baspasóz qyzmetine silteme jasap.
Senatorlar áýeli Talǵat Ibrashevty Joǵarǵy Sot sýdıasy qyzmetinen bosatý týraly el Prezıdentiniń usynysyn qarady. Atalǵan máseleni Konstıtýsııalyq zańnama, sot júıesi jáne quqyq qorǵaý organdary komıtetinde aldyn ala talqylaǵan depýtattar Palata otyrysynda Memleket basshysynyń usynymyn qoldaý jóninde sheshim qabyldady.
Sonymen qatar otyrysta Parlament depýtattary bastamashy bolǵan «Organıkalyq ónim óndirisi jáne aınalymy týraly» zań qaralyp, maquldandy. Atalǵan zań organıkalyq ónimniń ishki naryǵyn qalyptastyryp, damytýǵa, otandyq azyq-túlik óndirýshilerin organıkalyq ónim óndirýge yntalandyrýǵa jáne olardyń syrtqy naryqtardaǵy básekege qabilettiligin arttyrýǵa arnalǵan.
Zańda organıkalyq ónim óndirisine kóshýdiń negizgi sharttary qarastyrylǵan. Ony óndirýge jáne tańbalaýǵa, organıkalyq ónim aınalymyna tikeleı talaptar belgilengen. Sondaı-aq organıkalyq ónimdi esepke alý jáne qadaǵalaý júıesi engizilgen. Atap aıtqanda, sáıkestik sertıfıkaty bolǵan kezde organıkalyq ónimdi tańbalaý qarastyrylǵan. Osy rette organıkalyq aýyl sharýashylyǵyn agroónerkásiptik keshendegi suranysqa ıe baǵyt retinde damytý úshin Zań organıkalyq ónim óndirisi men aınalymy salasynda ǵylymı qamtamasyz etýdi reglamentteıtin bappen tolyqtyryldy.
Zańdy qaraý kezinde Senat depýtattary oǵan ilespe «QR-nyń keıbir zańnamalyq aktilerine organıkalyq ónim óndirisi jáne aınalymy máseleleri boıynsha ózgerister men tolyqtyrýlar engizý týraly» jáne «QR-nyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdardy da maquldady.
«Bul zańdar elimizde organıkalyq ónim naryǵyn damytý maqsatymen ázirlendi. Jańa normalar arqyly organıkalyq ónim óndirisi men aınalymynyń quqyqtyq, ekonomıkalyq jáne áleýmettik negizderi aıqyndalady. Sondaı-aq túzetýler aıasynda organıkalyq ónim naryǵyn memlekettik retteý sharalary qarastyrylyp otyr. Jalpy, maquldanǵan zańdar organıkalyq ónimderdiń sapasyn jáne otandyq óndirýshilerdiń básekege qabilettiligin arttyrýǵa yqpal etedi dep senemiz», degen Senat Tóraǵasy zańǵa bastamashy bolǵan depýtattarǵa alǵys bildirdi.
Palata otyrysynda senatorlar «Ǵylym jáne tehnologııalyq saıasat týraly» jáne oǵan ilespe «QR-nyń keıbir zańnamalyq aktilerine ǵylym jáne tehnologııalyq saıasat, platformalyq jumyspen qamtý jáne memlekettik baqylaý máseleleri boıynsha ózgerister men tolyqtyrýlar engizý týraly» jáne «Salyq jáne bıýdjetke tólenetin basqa da mindetti tólemder týraly» QR-nyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR-nyń Kodeksin (Salyq kodeksi) qoldanysqa engizý týraly» QR-nyń Zańyna ózgerister men tolyqtyrýlar engizý týraly» zańdardy birinshi oqylymda qarap, maquldady.
Atalǵan zańdardyń normalary ǵylymdy damytý jáne ǵylymı jetistikterdiń nátıjelerin engizý jónindegi tehnologııalyq saıasatty iske asyrý úshin qolaıly jaǵdaıdy qamtamasyz etýge arnalǵan. Senatorlardyń usynǵan túzetýler ǵylymı kadrlar daıarlaýdy qamtamasyz etýdi, sondaı-aq ǵylymı qyzmetkerdiń áleýmettik qorǵalý kepildikterin iske asyra otyryp, ǵylym salasynyń strategııalyq, kásiptik jáne áleýmettik máselelerin sheshýdi kózdeıdi.
Otyrys barysynda birqatar depýtattyq saýal joldandy.