S.Seıfýllın atyndaǵy Qaraǵandy oblystyq akademııalyq qazaq drama teatry Ýfada ótken ulttyq teatrlardyń halyqaralyq Vlll festıvalinde «Úzdik er adam róli úshin» atalymyn jáne arnaıy júldeni enshilep qaıtty.
Bashqurtstan astanasy Ýfa qalasynyń 450 jyldyǵyna arnalǵan aıtýly festıvalǵa Reseıden 15, Qazaqstan jáne Qyrǵyzstannan birneshe teatr qatysty.
Festıvalǵa jınalǵan qatysýshylar men qonaqtardy Bashqurtstan Respýblıkasynyń Mádenıet mınıstri Ámına Shafıkova quttyqtap, izgi tilegin bildirdi.
– Jalpy, teatr óneri álemge ortaq bolsa da, musylman halyqtary, onyń ishinde qazaq, qyrǵyz teatrlarynyń orny bólek. Olaı deýime sebep, bul elderdiń tarıhy tipti tereńde. Al tarıhy baı qaýymnyń qalyń kórermenge usynary álbette mol ári taǵylymdy bolary sózsiz, – dedi Ámına Shafıkova.
Rasynda, ár eldiń sahnalaǵan qoıylymynan alar taǵylym mol edi. Bir apta ishinde qazylar alqasy men sarapshylar túrli janrdaǵy 16 spektakldi kórip, talqylady. Ýfa qalasynyń teatr sahnalarynda kúnine úsh birdeı qoıylymnan kórsetilgen.
S.Seıfýllın atyndaǵy Qaraǵandy oblystyq akademııalyq qazaq drama teatry ulttyq teatrlar báıgesine Reseıdiń Vahtangov teatrynda, Eýropa teatrlarynda rejısserligimen shyńdalǵan qazaqtyń talantty rejısser qyzy Gúlnaz Balpeıisova sahnalaǵan Muhtar Áýezovtiń «Qaragóz» tragedııasyn alyp bardy. Ulttyq klassıka injý-marjanynyń búgingi kúnmen úndestirilip qoıylǵan jańa nusqasyn belgili halyqaralyq teatrtanýshylar men ónertanýshy sarapshylar joǵary baǵalady. Ásirese Sáken teatry akterleriniń sahna sheberligi, obraz keıipteýdegi ózindik oı-órnek, is-qımyl áreketterine qaıran qaldy.
Nátıjesinde, festıvaldyń negizgi segiz atalymynyń biri «Úzdik er adam róli úshin» júldesi «Qaragóz» qoıylymynda Narsha beınesin somdaǵan Sáken teatrynyń akteri Baýyrjan Nurmaǵambetovke berildi.
Al Ǵ.Músirepov atyndaǵy akademııalyq balalar men jasóspirimder teatry «Qulager» qoıylymy «Spektakldiń úzdik mýzykalyq-plastıkalyq sheshimi» atalymyn alyp berdi.
Munymen qosa Bashqurtstannyń ataqty akterleri sahna sheberligin erekshe tanytqan ártisterge de arnaıy júldeler tapsyrdy. Sáken teatrynyń aktrısasy Áneli Saǵyndyqovaǵa «Qaragóz» róli úshin berildi.
– «Týǵanlyq» festıvaliniń baǵdarlamasy tájirıbe almasý, belgili teatr tarlandarynyń sheberlik saǵattary sııaqty tanymdyq is-sharalarmen tolyǵyp otyrǵany da, festıvaldyń atyna saı qatysýshylardyń týys-týǵandyq qarym-qatynastaryn bekite tústi», – deıdi teatr basshysy Qurman Qalymov.
Festıvaldyń tarıhy 1991 jyldan bastaý alady. Alǵashqyda túrkitildes halyqtar teatrlarynyń festıvali atalǵanymen, búginde ol ulttyq teatr festıvali deńgeıine kóterilgen.
Qaraǵandy oblysy