Túlekterge arnalǵan jumys jármeńkesi

Jyl saıyn dástúrli túrde uıymdastyrylatyn jármeńke túlekterdi jumysqa ornalas­tyrýda ashyq dıalog alańyna aınalǵaly qashan. Nátıjesinde, túlekter bolashaq jumys ornyn tabý­ǵa múmkindik alady. Bıyl da atalǵan ýnıversıtetti 9 myńǵa jýyq stýdent bitirip otyr.

M.Áýezov atyndaǵy Ońtústik Qazaqstan ýnıversıtetiniń bas­qar­ma tóraǵasy – rektor mindetin atqarýshy Qaırat Nurmanbetov is-sharada quttyq­taý sóz sóılep, jár­meńkege qatysqan jumys berý­shi mekemelerge alǵysyn bildirdi.

– Joǵary oqý ornynan túlep ushqan jastarǵa mundaı jármeńke – jumysqa turýǵa zor múmkindik. Jas mamandar alysqa barmaı-aq, túıindemesin arqalap ár mekemeni aralamaı-aq osynda kompanııa, mekeme ókilderimen kózbe-kóz sóılesip, mamandyǵy boıynsha jumysqa ornalasýǵa kóp múmkindigi bar. Endeshe, jastar osy jeńil­dikti paıdalanyp, ózderi oqyp bitirgen mamandyǵynyń keleshekte jemisin kórýge tilektespiz. Bizdiń joǵary oqý orny sapaly mamandar daıarlaıdy. Búgingi tańda megapolıstegi jetekshi kásiporyndarmen kelisim jasalyp, sol boıynsha dýaldi oqytý júıesi qolǵa alynǵan. Iаǵnı stýdentter teorııa­men birge sol kásiporynda stanoktarmen jumys istep, tájirıbesin shyńdaıdy. Bul keleshekte olardyń kásibı maman atanýyna, sol jerde jumysqa qabyldanýyna úlken múmkindik beredi, – dedi Q.Nurmanbetov.

Jármeńkede Eńbekshi aýdany boıynsha Mansap ortalyǵynyń eńbek resýrstaryn boljaý jáne jumyspen qamtý bóliminiń basshysy Naǵıma Dosanova, «Renaissance SHIK» JShS dırektory Igor Karpov, «Sıtı-ınjınerıng» JShS dırek­tory Saıddın Ajıdınovtar da izgi tilek bildirip, jas túlekterge tabys tiledi. Olar óz kezeginde oqý orda­synyń bilimdi, izdenisi joǵary jas­ta­ryna bos jumys oryndaryn usy­nýǵa árdaıym daıyn ekenin jetkizdi.

Al is-shara barysynda bitirýshi túlekter jumys berýshilermen suhbattasyp, mamandyqtary týraly tolyqqandy aqparat alyp, mekemelerdiń ótinishimen túıindemelerin qaldyryp ketti. Máselen, kilem ónimderin shyǵaratyn jergilikti «Bal tekstıl» kompanııasy kilem toqıtyn stanoktarǵa operatorlar qajet ekenin jetkizdi. Jumysqa turýǵa kelgen jastardy atalǵan stanokta qalaı jumys isteý kerektigine oqytyp, sol úshin bastapqy úırený satysynda aqsha tóleýge de daıyn. Bul kásiporyn tek kilem toqymaıdy, oǵan kerekti jipti de ózderi ıiredi eken. Onda qazir 500-ge jýyq adam eńbek etedi. Atalǵan fabrıkaǵa jumysqa qabyldanǵan azamatqa barlyq áleýmettik jeńil­dik qaras­tyrylady. Sonyń ishinde tegin túski as, jumysqa tegin tasymaldaý, tegin arnaıy kıimmen qam­tamasyz etý sekildi jeńil­dik­ter bar. Alǵashqy jumysqa orna­las­qan kezde jumyskerdiń aılyq jalaqysy 150 myń teńgeden bas­talyp, tájirıbesi men biliktiline q­araı joǵarylaı beredi.

Sondaı-aq qaladaǵy taǵy bir iri toqyma fabrıkasy «Azala tekstıl» kompanııasy da ózderine tiginshi, toqymashy, hımııa­lyq zerthanashy mamandaryn jumysqa qa­byl­daýǵa osy jármeńkege kelip­ti. Bul kásiporynda da eń tómengi aılyq jalaqy 150 myń teńgeden bas­talady eken. Mamandar eki aýysym boıynsha jumys isteıdi. Ashanada tamaqtaný óte arzan deıdi kompanııa ókilderi. Máselen, keshen­di túski as 500 teńge turady. Degen­men jumys berýshiler toqyma stano­gin­de jumys isteý ońaı emes ekenin aıtty. Bilikti toqymashy bolý úshin biraz tájirıbe men tózim qajet.

Sonymen qatar jármeńke ke­zin­de qatysýshylar arasynda qy­zyq­ty oıyndar oınatylyp, is-shara dýmandy konsertke ulas­ty. Bıyl­ǵy jármeńkege iri ón­diris oshaq­tarymen birge Shym­kent qala­sy ákimdigine qarasty bas­qar­ma­lar, Túrkistan oblystyq soty­nyń keńsesi, qos óńirdiń prokýratý­ra­sy, halyqqa qyzmet kórsetý orta­lyq­tary, megapolıstiń mádenı me­ke­meleri men kitaphanalary qatysty.

ShYMKENT