Bıyl jyl bastala salysymen jetim balalar turǵyn úı máselesin kóterip, Memleket basshysyna tikeleı júginýine májbúr bolǵany esimizde. Prezıdent pen Almaty qalasynyń ákimine beıneótinish joldaǵan Almaty oblystyq №1 balalar úıiniń túlekteri Almaty oblysynyń ákimdiginde turǵyn úı alýǵa kezeginde turǵan, ıaǵnı Almaty qalasynyń turǵyn úı kezegindegi tizimde joq eken.
«Turǵyn úı qatynastary týraly» zańynyń 71-babynyń 1-tarmaǵyna sáıkes turǵyn úıge muqtajdardy esepke alý azamattardyń turaqty turatyn jeri boıynsha júrgiziletini belgili. Sondyqtan ótinish ıeleriniń turǵyn úı berýge qatysty máselesin sheship berý Almaty oblysy ákimdiginiń quzyretine kiretini aıan. Degenmen tul jetimderdi, jalǵyzilikti otbasylardy baspanaly etýdiń tetikterin jetildire túsý júktelgen Otbasy banktiń qoǵamdyq keńesiniń otyrysynda osy másele únemi talqylanyp qana qoımaı, naqty qadam jasalyp jatqany qýantady.
Máselen, osy aptada turǵyn úıge kezekte turǵan almatylyqtarǵa páter kilti tabystalsa, onyń ishinde kezekte turǵan jetim balalardyń 16%-nyń baspana máselesi sheshildi. Buǵan qosa Almatyda jalǵa beriletin páterlerdiń kilti tapsyryldy. Bul páterler halyqtyń áleýmettik osal toby retinde kezekte turǵan azamattarǵa qalanyń kommýnaldyq turǵyn úı qorynan bólingen.
Talaılardyń taǵdyryn ózgertip, qonystoıyna jetkizgen saltanatty kilt tapsyrý rásiminde Almaty ákimdigi HÁOT sanattaǵy adamdardy, atap aıtqanda, jetim balalardy turǵyn úımen qamtamasyz etý máselesine erekshe nazar aýdara bastaǵany aıtyldy. 2022 jyly Almaty qalasynyń kommýnaldyq turǵyn úı qorynan jetim balalarǵa 14 páter tabystalsa, 2023 jyly 55 páter berilgen eken.
«Bıyl HÁOT sanaty úshin 2 myń adamǵa jalǵa beriletin páter berý josparlanyp otyr. Onyń 400-i – jetim bala. Bul – Almaty qalasynyń ákimi Erbolat Dosaevtyń jeke bastamasy. Muqtajdar úshin jalǵa beriletin páterlerdiń 20%-y jetim balalarǵa bólinedi. Búgin biz Shuǵyla shaǵyn aýdanyndaǵy Alem City-2 turǵyn úı kesheninde ornalasqan úsh úıdegi HÁOT sanatyna jatatyn 124 kezekte turǵandarǵa páter kiltin tapsyrdyq. 124 páterdiń 49-y – bir bólmeli, 75-i – eki bólmeli», dedi Almaty qalalyq kommýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.
Basqarma ókiliniń aıtýynsha, jańa páter ıeleri aı saıyn baspanany jaldaý aqysyn tólep otyrýy kerek. Naýryzbaı aýdanynda bir bólmeli páterdi jalǵa alý quny – 10 myń teńge, eki bólmeli páter – 15 myńǵa jýyq, úsh bólmeli páter – shamamen 20 myń teńge. Sondaı-aq kommýnaldyq qyzmetti ýaqtyly tóleý qajet. Baǵdarlama sharty boıynsha azamattarǵa páterdi jalǵa berýge, qaıta josparlaýǵa tyıym salynady.
Osyndaı páterge qol jetkizgen zeınetker Úmit Qurmanálıeva qala bıligine rııasyz alǵysyn aqtara otyryp: «Bul kún – men úshin naǵyz mereke. Uzaq jyldar boıy kezekte turdym, biraq eshqashan úmitimdi úzbedim», deıdi.
Oraıy kelip turǵanda, memlekettik turǵyn úı qorynan turǵyn úılerdi (jańadan paıdalanýǵa berilgen nemese turǵyndar bosatqan) nemese jeke turǵyn úı qorynan jergilikti atqarýshy organ jaldaǵan turǵyn úılerdi bólý kezinde jetim balalar men ata-anasynyń qamqorlyǵynsyz qalǵan balalarǵa kommýnaldyq qordan turǵyn úılerdiń jalpy sanynyń keminde 20%-y bólinetinin eske sala keteıik.
ALMATY