Oblystyq tarıhı-ólketaný murajaıynyń kórme zalynda turǵan qos naızanyń ushyn arheologter 2009 jyly Beıimbet Maılın aýdanyndaǵy Halvaı qorǵanyndaǵy kóne qorymnan tapqan. Ǵalymdardyń aıtýynsha, qundy jádigerler bizge qola dáýirindegi kóshpeliler órkenıetiniń syntasty mádenıetinen jetken.
Naıza ushynyń ekeýi de qoladan quıylǵan. Bireýiniń uzyndyǵy 203 mm, japyraq tárizdi súıir ushynyń uzyndyǵy – 111 mm. Uzyndyǵy 92 mm bolatyn uńǵysynda aǵash saptyń qaldyqtary saqtalǵan. Syrtynan qaıyspen oralǵan.
Ekinshi naızanyń ushy jýandaý – uńǵysynyń jıegi jumyrlanǵan, japyraq tárizdi súıir ushty. Ushtyqtyń uzyndyǵy – 224 mm. Uńǵysynda shashaq baılaýǵa arnalǵan qulaǵy bar. Sapqa kıiletin bóligi qulaqsha arqyly ótetin qaıyspen oralǵan. Munyń uńǵysynda da aǵash sabynyń qaldyǵy bar.
«Halvaı qorǵanynyń qazba jumystaryn 2009-2010 jyldardaǵy dalalyq maýsymda Torǵaı arheologııalyq ekspedısııasy júrgizdi. Bul ekspedısııaǵa jergilikti arheolog ǵalym Andreı Logvın jetekshilik etti. Halvaı qorǵany birneshe qorǵan men eski qonystan turady. Eskertkish Qaratomar sý qoımasynyń Tobyl salasynyń sol jaǵalaýynda, Beıimbet Maılın aýdanyndaǵy Halvaı eldi mekeniniń soltústik shyǵysyna qaraı 7 shaqyrymdaı jerde ornalasqan. Jartysyna jýyǵyn sý shaıyp ketken eski qorǵandy 2008 jyly jergilikti turǵyndar tapqan. Qorǵannyń aýmaǵy 32 metr, bıiktigi shamamen 1 metrdeı bolady. Qazba jumystary barysynda qorǵannan 11 jerleý orny tabyldy. Olar qaıyń jáne qaraǵaı bórenelerimen jabylǵan. Jabynnyń astynan 7-8 jastaǵy balanyń beıiti bar eken. Qorǵandaǵy jerleý quraldarynyń ishinde naıza ushtarynan basqa da ydystar, qola pyshaq, úsh qola, toǵyz tas, tórt aǵash jebeniń ushy, qola aıbalta, kelsap tabyldy. Tóbeniń jabyndysynda ıttiń qańqasy jatqan», deıdi mýzeı qyzmetkeri Názıma Otasheva.
Qostanaı oblysy