Elbasy Nursultan Nazarbaev Ýkraına Prezıdenti Petr Poroshenkomen telefon arqyly sóılesti, dep habarlady Prezıdenttiń baspasóz qyzmeti.
Memleket basshylary Ýkraınadaǵy qazirgi ahýaldy, sondaı-aq, ekijaqty yntymaqtastyq máselelerin talqylady.
P.Poroshenko joǵary deńgeıdegi kezdesýdi óziniń Astanada ótkizýge yqylasty ekenin rastady. Ol, sonymen qatar, taıaý ýaqytta «normand tórttiginiń» syrtqy ister mınıstrleri men Shyǵys Ýkraınadaǵy daǵdarys jónindegi baılanys tobynyń kezdesýi ótetinin, onda Qazaqstannyń elordasynda talqylanatyn qujattyń jobasy ázirlenetinin atap ótti.
Áńgime barysynda Ýkraına, Reseı, Germanııa jáne Fransııa kóshbasshylarynyń Astanadaǵy kezdesýin qańtardyń aıaǵynda ótkizý qarastyrylyp otyrǵany aıtyldy.
Telefon arqyly sóılesýge Ýkraına jaǵy bastamashy boldy.