Qazaq – ejelden óziniń en-tańbasy men kók baıraǵyn qasıettep, qasterlep ustaǵan halyqtyń biri. Nebir zamanalardyń tar jol, taıǵaq keshý kezeńderinde óz eliniń tańbasy men baıraǵyn esh jaýǵa bermegen, eshkimge de aldyrmaǵan. Sol uly qasıet daryǵyn halqymyz búgingi kúni óziniń Týyn kóterip, Eltańbasyn jarqyratyp, Ánuranyn shalqyta shyrqap, tórtkúl dúnıeniń tórt buryshyna, aıdaı álemge tanylyp otyr.
Ár jyldyń 4 maýsym kúnin Memlekettik rámizder kúni dep atap ótýimizdiń úlken tarıhı mánin ulttyq qundylyq retinde ustanyp kele jatqan ulttyq bitim-bolmysymyzǵa da tyǵyz baılanysty.
Prezıdent Qasym-Jomart Toqaev Atyraýda ótken Ulttyq quryltaıdyń úshinshi otyrysynda: «Ulttyq biregeıligimiz memlekettik rámizderde aıqyn kórinis tapqan. Bizdiń kók týymyzda min joq. Onda elimizdiń biregeı bolmysy naqty beınelengen. Ánuranymyz da naǵyz ulttyq rýhty pash etedi. Qazaqtyń Ánurany álemniń ár túkpirinde shyrqalyp júr. Jańa jyldy jaqyndarymyzdyń ortasynda Ánuranmen qarsy alý jaqsy dástúrge aınaldy. Bir sózben aıtsaq, Ánuranymyzdyń sózi de, áýeni de halyqtyń júregine ábden ornyqqan», degeni de osy ulttyq bolmysymyzdyń biregeıligin kórsetedi.
Memlekettik rámizderge degen qurmet – elge, memleketke degen qurmet. Biz elimizdiń Týy, Eltańbasy, Ánuranyna degen qurmetti jáne súıispenshilikti óz urpaqtarymyzdyń boıyna bala kúninen sińirýimiz qajet. Bul oraıda keıingi jyldary Memlekettik rámizderdi keńinen nasıhattaý sharalary júıeli júrgizile bastady, Týdy ilýdiń jańa qaǵıdalary ornyqty. Qazir Ánuran oınalsa boldy, tipti aıaǵyn jańa basqan baldyrǵannyń ózi sábı qolyn júreginiń tusyna qoıyp, tura qalatynyna qalaı súısinbeısiń?
Bıylǵy Jańa jyl keshinde álemge áıgili ánshi Dımash Qudaıbergen memlekettik Ánurandy oryndaǵanda tolqymaǵan, tebirenbegen adam joq, sirá! Sonyń arqasynda elimizdiń Ánuranyn álemniń túkpir-túkpirindegi halyqtar shyrqaı bastady. Buǵan qalaı qýanbasqa!
Biz – álem súısinip otyrǵan tańbaly elmiz, tanymal elmiz. Eldiń birligin, halqymyzdyń yntymaǵyn nyǵaıta túser Memlekettik rámizderimizdiń kúsh-qýaty da eshqashan sarqylmasy anyq.
Jabal ERǴALIEV,
Qazaqstannyń eńbek sińirgen qaıratkeri,
Senatorlar keńesiniń múshesi