Kók týdyń jelbiregeni janyna qýat beretin jastar kóp búginde. Jandy tebirentip, rýhty oıatatyn patrıottyq ándi jatqa aıtýmen qatar, elimizdiń Týyn álemge maqtanysh tutyp júrgenderi de az emes.
Jýyrda Túrkııa memleketiniń Ystanbul qalasynda halyqaralyq «Ipek Yolu» balalar jáne jas talanttar óner festıvali ótti. О́ner dodasyna qatysqan Tóle bı aýdany Leńgir qalasyndaǵy №5 mektep-gımnazııa oqýshysy Meıirhan Rahym joǵary dárejede óner kórsetkeni úshin Gran-prı ıegeri atandy. Halyqaralyq baıqaýǵa álemniń barlyq memleketinen talantty jastar qatysyp, baq synady. Sarapshylar kishkentaı ónerpazdyń sahnada ózin-ózi ustaýyna, daýys yrǵaǵyna, sezimtaldyǵyna joǵary baǵa bergen. Ustazy, mýzyka pániniń muǵalimi Tatıana Matveevanyń qoldaýymen, áýezdi daýsymen ónerin shyńdaı bilgen jas talant ıesi bas júldeni jeńip aldy. Dımash Qudaıbergenniń ánderin tyńdap ósken Meıirhan týma talant ıesi. Osy kezge deıin aýdandyq, oblystyq, respýblıkalyq deńgeıdegi baıqaýlarǵa qatysyp, ónerimen órge shyqty. Respýblıkalyq balalar shyǵarmashylyq «Bala Fest» festıvalinde bas júlde ıelense, al «Zhibek zholy Kazakhstan» baıqaýynyń Gran-prı ıegeri atandy. Osy baıqaý nátıjesimen Túrkııaǵa arnaıy joldama utyp alyp, talantymen álemdik deńgeıge kóterildi.
El Týyn Túrkııada jelbiretken taǵy bir daryn ıesi – Saıram aýdanyndaǵy M.Orazalıev atyndaǵy №41 mektebiniń 9-synyp oqýshysy Káýsar Nurlanqyzy kóktemde jas sýretshilerdiń «Uly dala urpaǵy» respýblıkalyq baıqaýyna qatysqan bolatyn. Baıqaý barysynda «Beıneleý óneri» atalymymen marapattalyp, Astanada ótken «Atadan mura» qorynyń respýblıkalyq baıqaýlarynyń sýperfınalyna, odan keıin Túrkııa elindegi halyqaralyq baıqaýǵa joldama jeńip alǵan edi. Mine, endi Káýsardyń jarys joly Túrkııa memleketiniń Ystanbul qalasynda jalǵasty. Álemniń kúlli elinen qatysqan qylqalam sheberleri saıysynda onyń salǵan sýreti úzdik sanaldy. Nátıjesinde, «Daryndy juldyzdar» balalar men jasóspirimder ortalyǵynyń uıymdastyrýymen ótken «Ipek yolu» halyqaralyq balalar festıvalinde bas júldeni jeńip aldy. Elimizdiń Týyn álemdik deńgeıde bıikke kóterip, Ánuranyn shyrqatyp júrgen jastar qanshama. Shetelderge jarysqa nemese baıqaýǵa attanatyndardyń barlyǵy el rámizderiniń mán-maǵynasy, sıpaty men tarıhyn jatqa biletini anyq.
Jatqa biledi demekshi, dúnıejúzi memleketteriniń ataýlary men jalaýlaryn jańylmaı tanıtyn oqýshy bar. Túrkistan oblysynda. Boıyndaǵy darynymen erekshelengen oqýshyny ustazdary da maqtan tutady. Ár eldiń ataýy kóbine sol eldi quraıtyn ultqa baılanysty qoıylady. Maqtaaral aýdanyna qarasty Nurlybaev aýyldyq okrýgi №26 Y.Altynsarın mektebiniń 6-synyp oqýshysy Baǵlan Ábdiǵappar ataýlardyń shyǵý tarıhy men maǵynasyn bilýge qyzyǵypty. Ustazdarynyń aıtýynsha, shet memleketterdiń astanasy men ataýlaryn jattaýǵa 9-10 jasynan bastap qyzyǵýshylyq tanytqan. Sodan beri dúnıejúziniń kartasynan ózi izdene otyryp, 207 memleketti jattaǵan. Baǵlannyń darynyn alǵash baıqaǵan – atasy Ábdiǵappar. Nemeresiniń boıyndaǵy erekshelikti damytý úshin ol Baǵlannyń sońynan ergen ini-qaryndastaryna da memleketterdiń ataýlary men astanalaryn ornalasqan jeri boıynsha úıretýdi ádetine aınaldyrǵan. Árdaıym nemeresiniń ynta-yqylasyn damytyp otyrýdy qolǵa alǵan Ábdiǵappar aqsaqal Baǵlannyń bul ereksheligin odan ári damytyp, kópke úlgi bolsa degen nıette.
Túrkistan oblysy