Ár sportshynyń asqaq armany jáne basty maqsaty – Olımpııa oıyndary men álem chempıonattary sekildi dúbirli dodalarda óz eliniń ánuranyn shyrqap, týyn kókte jelbiretý. Memlekettik rámizder kúni osy jaǵdaıǵa baılanysty otandastarymyzdyń aıtqan áserli sózderin jadymyzda taǵy jańǵyrtýdy jón kórip otyrmyz.
Ábıba ÁBÝJAQYNOVA,
dzıýdodan álem chempıonatynyń eki dúrkin qola júldegeri:
– О́zbekstanda týyp-óstim. 11 jasymnan dzıýdomen aınalystym. Sol jaqta júrgende de atajurtqa qonys aýdaryp, dúbirli dodalarda óz elimniń namysyn qorǵaýdy armandadym. Mektepte oqyp júrgen kezimde jalǵyz ózim Almatyǵa keldim. Elishilik dodalarda myqtylyǵymdy moıyndatyp, ulttyq komandaǵa qabyldandym. Odan keıin halyqaralyq jarystarǵa qatysa bastadym. Qol jetkizgen tabysym az bolǵan joq. Bıik belestiń birazyn baǵyndyrdym. Al 2022 jyly Tashkentte ótken álem chempıonatynda qola medal ıelenip, qazaqtyń kók baıraǵyn kókte jelbiretkenimde, qýanyshymda shek bolmady. О́ıtkeni sol kúnge deıin atalǵan jarysta jeńis tuǵyryna kóterilgen birde-bir qazaq qyzy bolmaǵan. Sondaı baqtyń maǵan buıyrǵanyna qatty qýandym. Odan keıin atalǵan jarysta taǵy bir ret júlde aldym. Azııa oıyndary men qurlyq chempıonattarynda da tabysqa jettim. Mine, endi Olımpııa oıyndaryna baramyn. Buıyrtsa, Parıjdegi dodada da ónerimmen Qazaq elin qýantamyn degen oıdamyn.
Elena RYBAKINA,
tennısten «Ýımbldon» týrnıriniń jeńimpazy, álemniń tórtinshi raketkasy:
– Máskeýde dúnıege kelip, sporttyq kareramdy Reseıdiń astanasynda bastaǵanymmen, 2018 jyldan beri 19 jasymnan Qazaqstannyń týy astynda óner kórsetip kelemin. Osyndaı qadamǵa barǵanyma esh ókinbeımin. Sportshy retinde ósýime Qazaqstan barlyq jaǵdaı jasady. Maǵan sendi, úmit artty. Jergilikti jankúıerler jyly qarsy aldy. Osydan artyq ne kerek? Sol senimniń, qamqorlyq pen qoldaýdyń arqasynda kórsetkishim de ýaqyt ozǵan saıyn jaqsara tústi. Qysqa ǵana merzim aralyǵynda «Ýımbldondy» uttym, Aýstralııanyń ashyq birinshiliginiń fınalynda oınadym, WTA týrnırlerinde segiz ret top jaryp, qazirgi kezde álemniń tórtinshi raketkasy atanyp otyrmyn. Eger osy jeńisterim Qazaqstan jastarynyń tennıske degen qyzyǵýshylyǵyn oıatyp, kortta óner kórsetip júrgen jas órenderdiń jeńiske degen jigerin arttyrsa, men úshin úshin basty jeńis osy!
Narıman QURBANOV,
sporttyq gımnastıkadan Azııa oıyndarynyń júldegeri, Álem kýbogi men qurlyq chempıonattarynyń birneshe dúrkin jeńimpazy:
– Ár jarys saıyn elimizdiń Ánurany shyrqalyp, Týy kókte jelbiregende, jer-jahan jurtshylyǵy osy kórinisti oryndarynan tik turyp tamashalap, syrttaı súısinedi. Al AQSh, Qytaı, Reseı, Ulybrıtanııa, Japonııa, Fransııa, Italııa, Ispanııa, Ońtústik Koreıa, Túrkııa, taǵy basqa alpaýyttardan baıraǵymyz joǵary tursa, olar bizge qyzyǵa da qyzǵana qaraıdy. Ondaı sátterde keýdemizdi maqtanysh sezimi kerneıdi. Erekshe kúı keshemiz. Maqtanamyz, shattanamyz, jeńiske degen qushtarlyǵymyz arta túsedi. Tipten baqyttan basymyz aınalady desek te bolady. О́zim de otandyq sporttyń abyroıyn asqaqtatyp, mártebesin kóterýge bir adamdaı-aq eńbek sińirip júrmin. Elimiz sportshylarynyń sol jeńisti joly uzaǵynan bolatynyna senimiz zor.