Mamyr aıynyń qorytyndysy boıynsha Qazaqstannyń kásipqoı boksshylarynyń reıtıngi shyǵaryldy. Úzdikter kóshin – orta salmaqtaǵy Jánibek Álimhanuly (15-0, 10 KO) bastap tur.
Árıne, oǵan esh tańdanýǵa bolmaıdy. О́ıtkeni ol otandyq bylǵary qolǵap sheberleri arasynan jalǵyz ózi ǵana álem chempıony atanyp otyr. Jánibekke bir emes, eki birdeı beldi nusqanyń altyn belbeýi tıesili. Bul kúnderi ol Jańa Zelandııanyń ókili Andreı Mıhaılovıchpen jekpe-jekke daıarlanyp jatyr. Atalǵan aıqas 13 shildede AQSh-tyń Las-Vegas qalasynda ótedi.
Dál sol salmaq dárejesinde kúsh synasyp júrgen Meıirim Nursultanov (20-0, 11 KO) ekinshi oryndy ıelengen. Onyń da chempıondyq táj úshin talasatyn kúni jaqyn. Úzdik úshtikti saqa sportshy Janqosh Turarov (28-0, 20 KO) túıindep tur. Sondaı-aq TOP-10-dyqtyń qatarynda Batyr Júkembaev (23-1, 17 KO), Sultan Záýirbek (17-0, 12 KO), Bekman Soılybaev (18-1, 9 KO), Sergeı Lıpınes (18-3-1, 13 KO), Bek Nurmaǵanbet (11-0, 9 KO), Álı Ahmedov (21-1, 16 KO), Jan Kosobýskıı (19-1, 18 KO) syndy sańlaqtar bar.