Kúni keshe ǵana qurylǵan HAS PRO BOXING promoýterlik kompanııasy Almatydaǵy ADD sport kesheninde kásipqoı bokstan óziniń tusaýkeser týrnırin uıymdastyrdy.
Keshtiń basty jekpe-jeginde 63,5 kg salmaq dárejesindegi Vıktor Kotochıgov pen Mıras Ertanov kúsh synasty. Bul básekeniń favorıti Kotochıgov edi. О́ıtkeni onyń qarsylasyna qaraǵanda tájirıbesi áldeqaıda zor. Tarazdyq boksshy 16 kezdesý ótkizip, onyń 14-inde jeńiske jetti. Bes básekelesin aıqyn basymdyqpen jeńdi. Vıktor Qazaqstannan bólek, Qytaı, Reseı, Germanııa, Grýzııa, BAÁ, Polsha jáne Anglııada óner kórsetti. Al Ertanov ta onyń biri de joq. Onyń rekordy – 6 kezdesý, 5 jeńis, 1 jeńilis. Desek te azýly qarsylasymen esh qaımyqpaı aıqasqan Mıras bul básekede óte saýatty judyryqtasyp, upaı sanymen basym tústi. Sóıtip, Gran-prı saıysynyń fınalyna joldama aldy. Aqtyq synda Mırastyń kimmen judyryqtasatyny atalǵan promoýshenniń kelesi jarysynda anyqtalady. Gran-prıdiń qorytyndysy boıynsha jeńimpaz atanǵan boksshyǵa 3 mıllıon teńge kóleminde syıaqy beriledi.
Almatydaǵy týrnırde jankúıerler taǵy birneshe qyzyqty jekpe-jektiń kýási boldy. Máselen, jastar arasyndaǵy álem chempıony Balaýsa Muzdımanǵa (53,5 kg) úndistandyq Monıka Sınghty uryp jyǵý úshin nebári 43 sekýnd jetkilikti boldy. Saǵatbek Musahanovtyń shákirti qarsylasyn búıirden uryp qulatty. Álem chempıonaty men Azııa oıyndaryna qatysýshy, qurlyq birinshiliginiń qola júldegeri Sanatáli Tóltaev (63,5 kg) Dmıtrıı Hasıevti ońdyrmaı sabady. Tóreshi jekpe-jekti úshinshi raýndta toqtatty. Sanatáliniń syńary Samatáli (61,2 kg) tájikstandyq Elshibek Nızovmamadovty upaı sanymen utty. Áıgili bapker Nurlan Aqúrpekovten tálim-tárbıe alǵan Nursultan Amanjolovtyń (+90,7 kg) qarsylasy ózbek- standyq Muhıddın Rabjapbaev úshinshi raýndtan keıin básekeni jalǵastyrýdan bas tartty. Byltyr Azıadada kúsh synasqan Ertýǵan Zeınýllınov (63,5 kg) Úndi elinen kelgen Bathı Sınghty altynshy raýndta aıqyn basymdyqpen jeńdi.