Qostanaıdaǵy Jastar saraıynda Memlekettik rámizder kúnine arnalǵan «Jyl patrıoty» forýmy ótti. Saltanatty is-shara barysynda óńir damýyna eleýli úles qosyp júrgen túrli salanyń ókilderi men tabandy eńbegimen aıtarlyqtaı jetistikke jetken azamattarǵa, sondaı-aq qoǵamdyq isterge belsene atsalysyp, el ıgiligi úshin ter tógip júrgen kópke úlgi jandarǵa qurmet kórsetildi.
Saltanatty is-sharanyń basynda Memlekettik ánuran oryndaldy. Odan keıin oblys ákiminiń orynbasary Rınat Muhametqalı eldigimiz ben tuǵyrly tutastyǵymyzdy aıshyqtaıtyn Memlekettik rámizder kúnimen quttyqtap, kópshilikke jyly lebizin arnady.
«Aspan tústes baıraǵymyz ben eltańbamyzdyń árbir elementinde jáne Ánuranymyzdyń árbir sózinde halqymyzdyń Otanǵa degen mahabbaty men arman-muraty jatyr. Memlekettik rámizder – rýhymyzdy asqaqtatyp, keýdemizge nur quıatyn, baqytqa jetelep, ómirge qushtar etetin erekshe qasıetke ıe. Birtutastyǵymyzdy saqtap turý úshin biz árqashan ózimizdiń memlekettik, ulttyq múddemizdi, Táýelsizdigimizdi qorǵaýǵa daıyn bolýymyz qajet. Memleket basshysy Qasym-Jomart Toqaev Ulttyq quryltaıdyń úshinshi otyrysynda táýelsizdik, otanshyldyq, birlik, yntymaq, ádildik jáne jaýapkershilik, zań jáne tártip, eńbekqorlyq pen kásibı biliktilik, jasampazdyq hám jańashyldyq degen uǵymdardyń mánin tarqata kelip, «Ultymyz osy ıdeıalyq negizderdi basshylyqqa alsa, boljaýsyz jáne qarqyndy damyp kele jatqan HHI ǵasyrdan laıyqty ornyn tabady», degen edi. Otandy súıý, týǵan jerge, elge, halqyńa degen súıispenshilik, perzenttik mahabbat elińniń rámizderin tanýdan bastalady. Sonymen qatar memlekettik rámizdiń ajyramas, enshiles bóligi – memlekettik til. Búgin biz Otanǵa degen súıispenshiligin kúndelikti eńbegimen, naqty jetistikterimen dáleldeı bilgen, osylaısha halyqtyń yqylasyna bólengen naǵyz qazaq patrıottarynyń beınesin nasıhattap júrgen azamattardy marapattaımyz. Barshańyzdy Memlekettik rámizder kúnimen quttyqtaımyn. Kók baıraǵymyz tuǵyrynan máńgi túspesin, elimizdiń mártebesi asqaqtaı bersin!» dedi Rınat Zákıuly.
Budan soń kezek jyl patrıottaryn marapattaý rásimine berildi. О́ńirdiń damýyna, ósip-órkendeýine atsalysyp júrgen ǵylym, bilim, mádenıet, sport, medısına, volonterlik, ónerkásip, aýyl sharýashylyǵy, tehnologııa, bıznes salasynyń ókilderi jáne erlik isimen kózge túsken azamattar 11 atalym boıynsha marapattalyp, arnaıy syılyqtarǵa ıe boldy.
Eńbegi elenip, esimi ardaqtalǵan qýanysh ıeleriniń biri – jergilikti mal sharýashylyqtaryna mal basyn asyldandyrýǵa, etti iri qara tuqymynyń babyn tabýǵa ǵylymı keńes berip, tehnologııa jolyn kórsetip júrgen jas ǵalym Indıra Aıtjanova.
«Memlekettik rámizder kúni merekesine oraı oblys ákiminiń arnaıy dıplomyn alyp, qýanyp qaldyq. Ánuranymyz aıtylǵanda tolqymaıtyn qazaq joq shyǵar. Memlekettik rámizderdi biz óz Otanymyzdy súıý, óz Otanymyzdyń damýy úshin adal eńbek etý arqyly qurmetteımiz», deıdi Indıra.
Merekelik is-sharada tabıǵı apatqa qarsy kúreste bar kúsh-jigerin jumyldyrǵan, sý tasqynyna tosqaýyl qoıýǵa belsendi aralasqan ujymdardyń da eseli eńbegi eleýsiz qalmady. IIM Shyraqbek Qabylbaev atyndaǵy Qostanaı akademııasy, Qarýly kúshteriniń 99260 áskerı bólimi, Ulttyq ulannyń 6697 áskerı bólimi, oblystyq PD, «Nadejda plıýs kst» qoǵamdyq birlestigi, «Barys», «Regıon-10», «DOS» erikti izdeý-qutqarý jasaqtary, Ahmet Baıtursynuly atyndaǵy ýnıversıtet, oblystyq QHA, oblystyq JRO, «Qostanaı-Sý» mekemesi jáne taǵy basqa da ujymdar qala ákimi Marat Júndibaevtyń qolynan marapat aldy. Sonymen qatar ár aýdan, aýyldaǵy jastar resýrstyq ortalyǵy, ákimdik qyzmetkerleri, jeke kásipkerler de oblys ákiminiń gramotasyn ıelendi.
Sahna tórinde týǵan ólkeniń qadir-qasıetin tereń túısindiretin kórinister kóńildi baýrap, rýhty qanattandyratyn án-jyr áýelep, kúı kúmbirlegen óner dýmany saltanatty is-sharanyń kórkin qyzdyra tústi.
Qostanaı oblysy