Ermeksazdan erekshe keıipkerler jasap, olarǵa montajdyń qudiretimen jan bitiretin ónerdi «Stop Motion» deıdi. Ataýy siz ben bizge tańsyq óner qajyrly eńbekti qajet etedi. Máselen, bir sekýndtyq qozǵalys úshin jıyrma tórt kadr jasalady. Biraq «Qoly bilgen qum ústinen keme júrgizer» degen. Oǵan dálel – 9-synyp oqýshysy Ámın Oraz.
О́zi ssenarıı avtory, ózi músinshi hám operator Ámınniń bul salaǵa áýestigi erekshe. Segiz jasynan bastap ermeksazdy ermek etken dara darynnyń qazir elýden astam mýltıplıkasııalyq shyǵarmasy bar. Onyń «Tuzaq», «Shapalaq shoý», «Kim satqyn?» sekildi týyndylary kórermenniń erekshe yqylasyn oıatty. Ámınniń aıtýynsha, «Stop Motion» – shydam men baıqampazdyqty talap etetin óner. Máselen, 15 ıakı 20 sekýndtyq anımasııaǵa shamamen bir aptadaı ýaqyt ketedi. Ár kadrdy toqtatyp, ár qımyldy sýretke túsirip mýltfılm qurastyrý – rasynda ońaı sharýa emes.
«Men buryn «Dısneı» shyǵarmalaryn kórip otyryp, osyndaı týyndy jasaıtyn stýdııam bolsa dep armandaıtynmyn. Ol arman qazir maqsatqa aınaldy. Qazaq mýltıplıkasııasyn damytyp, tájirıbeli anımator bolǵym keledi. Ol kúnniń de aýyly alys emes shyǵar. «Stop Motion»-ǵa áýestigim sýret salýdan bastalǵan edi. Jalpy, sýret sala almaǵan adamnyń anımator bolýy ekitalaı. Keıin dápterime birneshe eskız syzyp, solardy sýretke túsirip, montajdap, keıipkerlerime jan bitirdim. Osylaısha, meniń alǵashqy «Dop», «Everest», «Tennıs», «Agent» sekildi tyrnaqaldy týyndylarym jaryqqa shyqty», deıdi ol.
Jas ta bolsa elimizdegi jańa janrdy jalpaq jurtqa jarııalap, ári qyzyq, ári qıyn ónerge bet burǵan Ámın Orazǵa qazaq mýltfılminiń atasy Ámen Qaıdarovtyń jolyn bersin deımiz.