Erlikpen qaza tapqan áskerı qyzmetshilerdi eske alý úshin Ulttyq ulan jaýyngerleri, qonaqtar men áskerı qyzmetshiler bólim aýmaǵynda ornatylǵan memorıalǵa gúl shoqtaryn qoıdy, dep habarlaıdy Egemen.kz «Batys» óńirlik qolbasshylyǵynyń baspasóz qyzmetine silteme jasap.
Osydan týra segiz jyl buryn oryn alǵan qandy oqıǵa áli kúnge deıin esimizde. 2016 jyly 5 maýsymda Ulttyq ulan áskerı qyzmetshileri janyn berip, qaýiptiń aldyn alyp qylmyskerlerdiń oıy júzege aspady. Osynaý qarýly qarsylaspen qaqtyǵys kezinde Ulttyq ulannyń «Batys» óńirlik qolbasshylyǵyna qarasty Aqtóbe qalasynda ornalasqan 6655 áskerı bóliminiń úsh áskerı qyzmetshisi maıor Danıel Maılybaev, kishi serjant Berikjan Qalıev, qatardaǵy jaýynger Dosbol Sapar áskerı qalashyqqa shabýyl jasaǵan kezde batyldyq pen janqııarlyq tanytyp, oqıǵa ornynda erlikpen qaza tapqan bolatyn. Búginde araǵa segiz jyl salyp qaza tapqan áskerı qyzmetshilerdi eske alý úshin Ulttyq ulan jaýyngerleri, qonaqtar men áskerı qyzmetshiler bólim aýmaǵynda ornatylǵan memorıalǵa gúl shoqtaryn qoıdy, sondaı-aq qaza tapqan ulandyqtardy bir mınýt únsizdikpen eske aldy.
Al, áskerı mindetin oryndaýda kórsetken eren erligi men qaıtpas qaısarlyqtary úshin maıor Danıel Maılybaev II dárejeli «Aıbyn» ordenimen (qaıtys bolǵannan keıin), kishi serjant Berikjan Qalıev (qaıtys bolǵannan keıin), qatardaǵy Dosbol Sapar (qaıtys bolǵannan keıin), qatardaǵy Baqtııar Qaıyrbekov III dárejeli «Aıbyn» ordenimen nagradtalsa, qatardaǵylar Syrym Súndetov pen Denıs Chernyshov «Jaýyngerlik erligi úshin» medalimen nagradtalǵan bolatyn.