Bar ǵumyryn ult mádenıetin nasıhattaýǵa arnap, álemge «Abaı joly» roman-epopeıasymen qazaqtyń myńjyldyq tarıhyn, saltyn, dástúrin dáriptegen kemeńger jazýshy, ǵulama ǵalym Muhtar Áýezovtiń ómir jolyna qatysty derekter, muraǵat materıaldary qashanda qundy.
Alash úkimetiniń astanasy bolǵan Semeı qalasynda Muqańa qatysty tarıhı oryndar men ǵımarattar jeterlik. Solardyń biri – 1918-1920 jyldary jazýshy turǵan qala ortalyǵyndaǵy akademık Pavlov kóshesi, 70 mekenjaıynda ornalasqan tarıhı ǵımarat. Bul úıdi Muhtar Omarhanulynyń turaq etkeni týraly jeke is paraǵynda jazylǵan. 1919 jylǵy qarasha aıynda M.Áýezov semınarııany bitirip, bastaýysh mektepke sabaq berý quqyna ıe bolady. Semeı gýbernııasynda keńes ókimeti ornaǵannan keıin ol birshama bılik qyzmetine aralasady. 1919 jyldan bastap ol gýbernııalyq revolıýsııalyq komıtette bólim basqarady. Oblystyq memlettik arhıvte M.Áýezovtiń Semeı gýbernııalyq revkomy bólimshesiniń meńgerýshisi bolyp júrgen kezdegi jeke isi saqtalǵan. Muraǵat materıalynda osy úıde turǵandyǵy kórsetilgen.
Tarıhı úı 1869 jyly salynǵan. Úıdiń jalpy aýmaǵy – 251,8 tekshe metr. Irgetasy betondy, lentaly. Qabyrǵalary 2,5 kirpishten qalanǵan. Tóbesi aǵashpen jabylyp, temir shatyrmen shatyrlanǵan, edeni taqtaı. Tereze men esikteri qoldan qarapaıym túrde jasalǵan.
Tarıhı ǵımarat Bolnıchnaıa kóshesi 62, Demıan Bednyı kóshesi, 11-13 degen mekenjaıdy ıelense, búgingi kúni Semeı qalasyndaǵy akademık Pavlov kóshesi, 70-úı dep ózgertilgen. Bul úıde tek qana Muhtar Áýezov emes, Alash arystary Álıhan men Ahmet, Mirjaqyp pen Sultanmahmut syndy tulǵalar aıaldaǵany týraly tarıhı derekter bar.
Semeı