Bıyl kúzde Astanada ótetin 5-shi Dúnıejúzilik kóshpeliler oıyndary qarsańynda sportshylar men sporttyq jylqylardyń jaǵdaıyn zertteýge arnalǵan 2 keshendi ǵylymı top quryldy. Olardyń biri atbegilikpen, ekinshisi ulttyq sport túrleriniń sportshylaryn daıarlaýmen aınalysady, dep habarlaıdy Egemen.kz QR Ulttyq sport túrleri qaýymdastyǵynyń baspasóz qyzmetine silteme jasap.
Toptardyń quramyna jetekshi ǵalymdar, veterınarlar, bıologtar, genetıkter, sondaı-aq sporttyq psıhologııa jáne medısına mamandary kirdi. Ǵalymdar oqý-jattyǵý jıyndary men jarystar ótkiziletin jerlerde sportshylar men sporttyq jylqylardyń fýnksıonaldyq jáne psıhologııalyq jaı-kúıine monıtorıng júrgizedi.
«Ulttyq sport qaýymdastyǵynyń bastamasymen jáne Týrızm jáne sport mınıstrliginiń qoldaýymen alǵash ret keshendi ǵylymı toptar quryldy. Birinshi top tikeleı sportshylarmen aınalysady – olardyń fýnksıonaldyq jaǵdaıy, jalpy dene shynyqtyrý daıyndyǵy tekseriledi, psıhodıagnostıka júrgiziledi, sodan keıin baryp jalpy jaı-kúıiniń qorytyndysy jasalady. Eger densaýlyǵynda qandaı da bir ózgerister bolsa, psıhodıagnostıka jáne sporttyq medısına boıynsha em-shara jasaımyz. Basty maqsat – sportshylarymyz kúzde Astanada ótetin Dúnıejúzilik kóshpendiler oıyndaryna joǵary deńgeıde daıyndalýy úshin olardyń densaýlyǵyn tekserý», dedi QR Ulttyq sport túrleri qaýymdastyǵynyń keshendi ǵylymı tobynyń úılestirýshisi Baqytjan Esjanov.
Ǵalymdar janýarlardyń jaǵdaıyn, daıyndyq barysyn jaqsartýǵa múmkindik beretin zertteýler júrgiziletinin atap ótti. Sonymen qatar sportshylardyń densaýlyǵyn jiti baqylap, olarǵa arnalǵan tamaqtaný kesheni uıymdastyrylatynyn tilge tıek etti.
«Sporttyq jylqylardyń jaǵdaıyna kelsek, belgili otandyq ǵalymdardyń tutas toby jylqylardyń jem-shóbin jaqsartýǵa, janýarlardyń fýnksıonaldyq jaǵdaıyn tekserýge múmkindik beretin zertteýler júrgize bastady. Bul top jaqsy nátıje kórsetý úshin jarysqa qatysatyn jylqylardyń daıyndyǵy men tózimdiligin tekseredi», dedi keshendi ǵylymı toptyń jetekshisi, a.sh.ǵ doktory Nabıdýlla Kıkebaev.
Qazirgi tańda keshendi ǵylymı toptar kókpar, teńge ilý, aýdaryspaq, jamby atý, dástúrli sadaq atý sportshylarynyń qurama komandalarymen qyzý jumys istep jatyr.
«Biz sportshylardyń aǵzasyn tekserip, joǵary nátıjege jetý úshin qandaı dárýmender qabyldaý kerek, qalaı tamaqtanǵany durys ekenin anyqtaımyz. Sportshylardyń júrek jáne ishki organdarynyń bıorıtimin tekserip, tamaqtaryn da soǵan saı uıymdastyramyz», dedi keshendi ǵylymı toptyń jetekshisi, p.ǵ.d., professor Anatolıı Qulnazarov.
Ǵylymı toptar sportshylar men jylqylarǵa Olımpıadalyq daıarlaý ortalyǵynyń bazasynda úsh aı boıy tekserý júrgizedi.
Qyrmyzy JUMAǴALIQYZY,
EUÝ stýdenti