Buǵan deıin Nazarbaev Zııatkerlik mektepteriniń túlekteri tapsyratyn qorytyndy emtıhan materıaldaryn satý men aldyn-ala taratý boıynsha aqparat taraǵan edi. Osy iske qatysty jan-jaqty tekserýdiń nátıjesin NZM ókili Ánýar Janǵozın aıtyp berdi, dep jazady Egemen.kz.
Júrgizilgen qyzmettik tekseristen keıin NZM oqýshysy tapsyrmalardy óz betinshe ázirlegen, al basqa oqýshylar ony naqty emtıhan materıaldary retinde taratqany belgili boldy.
Ánýar Janǵozın oqýshylardyń atalǵan mektepke túsý kezinde ishki tártip pen akademııalyq erejelermen tanysatynyn jazyp, anyqtalǵan oqýshy áreketi osy qaǵıdany buzǵanyn atap ótti.
«Anyqtalǵan buzýshylyqtarǵa sáıkes osyndaı keleńsizdikti týyndatqan oqýshylarǵa emtıhandardy qaıta tapsyrý quqyǵynsyz emtıhan nátıjelerin joıý týraly sheshim qabyldandy. Bul oqýshylar qorytyndy emtıhandar aıasynda UBT sertıfıkatyn alý múmkindiginen aıyrylady. Materıaldardy taratýǵa qatysqan qalǵan oqýshylarǵa da tártiptik jaza qoldanyldy», dep jazdy Ánýar Janǵozın.