Syrtqy ister mınıstrliginde Premer-mınıstrdiń orynbasary – Syrtqy ister mınıstri Murat Nurtileýdiń qatysýymen «Qazaqstannyń Izgi nıet elshileri» jobasyn iske asyrýǵa arnalǵan resmı rásim ótti. Bul jobanyń Memleket basshysy Qasym-Jomart Toqaevtyń tikeleı bastamasymen júzege asyrylyp jatqanyn aıta ketken jón.
Joba elge ǵana emes, shet memleketterge de tanymal bolǵan áıgili otandastarymyzdy tartý arqyly elimizdiń oń ımıdjin ári qaraı qalyptastyrý, tanymaldyǵyn arttyrý jáne zamanaýı Qazaqstannyń jetistikterin dáripteýge baǵyttalǵan. Joba IýNESKO, IýNISEF, BUUDB sekildi birqatar BUU júıesiniń halyqaralyq ınstıtýttarynyń qazirgi qoldanystaǵy nomınasııalaryna uqsas jasalǵan.
Prezıdent ákimshiligi qolǵa alǵan ıgi jobaǵa eńbegimen jáne darynymen óner, sport, ǵylym jáne basqa da salalarda jetistikterge jetken, sondaı-aq qaıyrymdylyq jumystaryna belsene qatysqan otandastar kirip otyr.
Mınıstrlikte ótken resmı is-sharaǵa skrıpkashy, Azııa-Tynyq muhıty óńiri orkestrleri alıansynyń dırektory Marat Bısenǵalıev, Olımpıada chempıony, veloshabandoz Aleksandr Vınokýrov, sýretshi jáne antııadrolyq qozǵalys belsendisi Káripbek Kúıikov, saıasattaný ǵylymdarynyń doktory jáne tarıhı kartalardy zertteýshi Muhıt-Ardager Sydyqnazarov, N.Tilendıev atyndaǵy Memlekettik akademııalyq folklorlyq-etnografııalyq «Otyrar Sazy» orkestriniń bas dırıjeri Dınara Tilendıeva, «Adam» laqapatymen tanylǵan estrada ánshisi Mırhıdaı Mırfarýh jáne álem rekordyn jańartqan alyp kúsh ıesi ári Gınnestiń rekordtar kitabyna engen Sergeı Syrýlnıkov qatysty.
Kezdesýde mınıstr Murat Nurtileý Prezıdent Qasym-Jomart Toqaevtyń osy bastamasynyń mańyzy erekshe zor ekenin atap ótti. Sondaı-aq búginde elimiz dúnıejúzilik qaýymdastyqta beıbitshilik pen turaqtylyqty tý etken ári qarqyndy damý jolyndaǵy memleket retinde keńinen tanylǵanyn aıryqsha atady.
– Álemniń 75 elinde 114 sheteldik mekememiz bar. О́tken jyly biz shetelde 3 jańa mekeme ashtyq. Bıyl qosymsha 2 elshilik, 1 turaqty ókildik jáne 4 bas konsýldyq óz jumysyn bastady. Jyldyń sońyna deıin taǵy 5 mekeme ashýdy josparlap otyrmyz. Qazaqstanda shetelderdiń 71 elshiligi men 25 konsýldyq mekemesi jáne 33 halyqaralyq uıymnyń ókildikteri akkredıtasııa alǵan.
Qazaq eliniń jeti birdeı kórnekti ókilin «Izgi nıet elshisi» retinde taǵaıyndaý da osy baǵyttaǵy Memleket basshymyzdyń birizdi ári tórt shuǵylasy teń syrtqy saıasatyna úlken qoldaý dep bilemiz, – dedi Syrtqy ister mınıstri.
Sonymen qatar ol kópultty halqymyzdyń kelisim men dıalogke degen dástúrli yqylasyna saı genetıkalyq kody syrtqy álemmen mazmundy jáne ózara tıimdi qarym-qatynastardyń kepili ekenine toqtaldy.
– Biz muny shetelde nasıhattaýymyz abzal. Osy tusta Birikken Ulttar Uıymynyń Jarǵysy men halyqaralyq quqyq negizindegi kópvektorly jáne syndarly syrtqy saıasatqa balama joq ekendigi aıqyn. Bizdiń kózimizdiń qarashyǵyndaı saqtaıtyn eń joǵary qundylyqtarymyz – elimizdiń egemendigi, táýelsizdigi jáne aýmaqtyq tutastyǵy. Bul ekonomıkalyq ósý jáne halyqtyń ál-aýqatyn arttyrýmen qosa, Qazaqstannyń halyqaralyq bedeli men rólin pash etedi, – degen M.Nurtileý aldaǵy ýaqytta «Izgi nıet elshileriniń» ıgi mıssııasy burynǵydan da ózekti bola túsetinin jetkizdi.
Mınıstr sóziniń sońynda izgi nıet elshileriniń álem qaýymdastyǵyna Qazaqstan týraly obektıvti habar jetkizetin parasat úni bolatynyna el senim artatynyn atap ótti.
Kezdesýde dırıjer Dınara Tilendıeva, veloshabandoz Aleksandr Vınokýrov sóz sóılep, ózderine osyndaı qurmetti mıssııa júktelgenine rızashylyqtaryn bildirip, álemdik aýqymdaǵy ıgi bastamaǵa uıytqy bolǵan Memleket basshysynyń atyna alǵys bildirdi.
Is-shara barysynda Qazaqstannyń Izgi nıet elshilerine olardyń elshi ekenin rastaıtyn «Qazaqstan for Peace» tósbelgisi, sertıfıkaty men kýáligi tapsyryldy.