Aýmaǵyna Túmenbaı, Temirlik aýyldary kiretin Kerege taýly Kegen aýyldyq okrýginde 6 myńǵa jýyq iri qara, 30 myńnan artyq qoı-eshki jáne 2 myńnan asa jylqy tirkelgen.
«Aýyl amanaty» baǵdarlamasymen 2,5% paıyz nesıe alyp, jumys júrgizý úshin 4 kooperatıvtiń nesıe qujattamasy daıyndalyp, «Qonaev» áleýmettik-kásipkerlik korporasııasyna joldandy. Nátıjesinde, 3 kooperatıvke 86 mln 500 myń nesıe maquldandy. Sondaı-aq atalǵan baǵdarlamamen 27 mln 600 myń teńge nesıege «Kegen AgroMash» aýylsharýashylyq óndiristik kooperatıvi qýaty joǵary 2 «YUTO» traktoryn jer jyrtý, óńdeý, shóp shabý, tyrmalaý agregattarymen alyp, bank qarajaty esebinen aýlymyzǵa ınvestısııa salyp otyr», deıdi Kegen aýyldyq okrýginiń ákimi Rýslan Masenov.
Okrýgte «Keńdala» baǵdarlamasymen de 13 mln 645 myń teńge qarajat alǵan sharýa qojalyqtary kóktemgi dala jumystaryn júrgizýge qyzý kirisip ketken.
Memlekettik baǵdarlamanyń shapaǵatyn qoı ósirýshiler de kórip jatyr. Kegen aýlynyń turǵyny Ábiljan Árishov aqsaqal «Asyl tuqymdy mal sharýashylyǵyn damytý» baǵdarlamasy arqyly 1 351 bas «Edilbaı» tuqymdy qoıdy 121 mln teńgege lızıngke alyp, baǵyp otyr.
«Mal baqqanǵa bitedi» demekshi, Jambyl oblysynan satyp alynǵan qazaqy quıryqty qylshyq júndi qoılar qystan qońdy shyǵyp, kóktemgi tóldeý naýqanynda ár saýlyq sońyna qozy ilestirip, qorasyn jas tólge toltyrǵan. Shóbi shúıgin Shóladyrdyń kúngeıli qyrattaryna jaıylymǵa shyqqan qoıdyń búgingi kúıi kóńil toǵaıtady. Enesiniń ýyzyna jaryǵan qara qozylar kók maısany qýalap, quldyrańdaıdy. Erte týǵan kepelerdiń salmaǵy osy kúni 45 kg-ǵa jetken.
«Taýly óńirde buǵan deıin arqar-merınos tuqymdy aq qoılar ósirýmen aınalystyq. Aq qoıdyń azaby az emes. Onyń tóli názik, sýyqqa tózimsiz bolǵandyqtan, kútimdi asa qajetsinedi. «Edilbaı» qoıy jylqy tektes sezimtal ári qımyl-qozǵalysy jyldam, sýyqqa da tózimdi. Týa sala tóli ilesip kete beredi. Qoı tóldetýge aýyldan 5 saqmanshy aldyq. Jasyratyny joq, osy kúni saqman tabý qıyn», deıdi jasy 80-nen asqan shopan ata.
Kópti kórgen kónekóz qarııa atakásipten jastardyń alshaqtap, qol úzip bara jatqanyna alańdaýly.
«Mal-janyń aman ba?» dep hal surasqan halyqtyń urpaǵymyz. Memlekettik baǵdarlamanyń arqasynda myńdaǵan qoı qozdatyp, órisimiz jas tólge toldy. Az kúnde Taqııatóbe degen jaılaýǵa shyǵaramyz. Qaraǵaıly taýdyń shóbi qunarly, malymyz qoń jınap, kúzde qaıta tómendeıdi», deıdi «Ersin» sharýa qojalyǵynyń jetekshisi Ábiljan ata.
Seksenniń seńgirine shyqqan qarııa Kegen aýlynda tirshilik ete júrip, 10-nan astam asyl tuqymdy jylqy, 100-ge jýyq iri qara ósirgen. Atty kútip-baptaý súıikti isi ekenin alǵa tartqan aqsaqal jal-quıryǵy taralǵan júırikteri respýblıkalyq, oblystyq jarystarda san márte júldemen oralǵanyn maqtan etti. Bul sharýany júrgizýdi kenje uly Ulan Árishovke senip tapsyrǵan. Ákeniń tálim-tárbıesin sińirip, kásibin alǵa dóńgeletip otyrǵan kásipker Ulan Ábiljanuly da óz uldaryn mal baǵýǵa mamandandyryp júr. Úlken uly Dıas veterınar mamandyǵyn tańdap, Almaty aýylsharýashylyq ýnıversıtetinde bilim alyp jatyr.
«Ersin» sharýa qojalyǵynda biraz jyldan beri shopan bolyp eńbek etetin Qýatnur Syrǵabaı atajurtqa 2013 jyly qonys aýdarǵan. Malsaq azamat baqqan qoıyn kózden tasa qylmaı, jaı-kúıin keltire baǵýynyń nátıjesinde qystan kúıli shyǵaryp, shyǵynsyz qozdatýǵa aıryqsha úles qosypty.
«Jyldyń tórt mezgilinde de tehnıkanyń kómegi qajet. Sharýashylyqqa tıesili tehnıkalarymyz jetkilikti, degenmen keleshekte sanyn arttyryp, jańalaýdy josparlap júrmiz. Mal azyǵyn qosymsha satyp alamyz», deıdi Ulan Ábiljanuly.
Almaty oblysy