Túrkistan oblysynda turǵyndardyń ekologııalyq saýatyn kóterý, qorshaǵan ortany taza ustaýǵa baǵyttalǵan is-sharalar júıeli ótkizilip keledi. Mysaly, kúni keshe Saryaǵash aýdanynyń Darbaza, Jartytóbe aýyldyq okrýgterinde jáne aýdan ortalyǵynda ishki kóshelerdiń boıyndaǵy kúl-qoqystardy, aryq-atyzdardy tazalaý, shópterdi orý jumystary júrgizildi.
Jalpy, Saryaǵash aýdany aýmaǵynda jyl basynan beri 73 senbilik ótkizilgen. Senbilik barysynda 500 kóshe, 161 shaqyrym aıaqjol, 200 shaqyrym aryq-atyzdar, 103 shaqyrym ırrıgasııa júıeleri tazalandy. Sonymen qatar 37 aıaldama, 34 saıabaq pen skverler, 47 sport alańshasy syrlanyp, retteldi. Senbilikterge 20 000 adam qatysyp, 343 tehnıka jumyldyryldy. Nátıjesinde, 676 tonna kúl-qoqys arnaıy oryndarǵa tasymaldandy. Sondaı-aq tabıǵı resýrstar jáne tabıǵat paıdalanýdy retteý basqarmasyna qarasty «Jasyl aımaq» KMM tarapynan berilgen 31 700 túp uzaq jyldyq aǵash kósheti qala jáne 13 aýyldyq okrýg aýmaqtaryna, demeýshiler esebinen Saryaǵash qalasy jáne Qaplanbek aýyldyq okrýginde 4 200 aǵash jáne gúl kóshetteri egildi.
«Biz «Taza Qazaqstan» ekologııalyq aksııasyn jalǵastyramyz jáne apta saıyn pysyqtap otyramyz. Oblys aýmaǵy taza bolsa, qoǵam da, qoǵamnyń oıy da tazarady. Qoǵam bolyp kiriskende ǵana aımaq tazaryp, ajary ashylady», dedi oblys ákimi Darhan Satybaldy tazalyq jumystary saralanǵan májiliste. Al jıynǵa qatysqan Prezıdent Ákimshiliginiń memlekettik ınspektory Erlan Isabekov bul bastamanyń árbir óńirde sapaly ótýi turaqty baqylaýda ekenin aıtty. «Túrkistan oblysynda aksııa aıasynda kóptegen jumys atqaryldy. Memleket basshysy bul bastamany turaqty negizde jalǵastyrýdy tapsyrdy. Osyǵan baılanysty ákimdikter halyqtyń ekologııalyq mádenıetin damytýdyń 2024–2029 jyldarǵa arnalǵan óńirlik josparlaryn ázirleýi qajet. Qazirgi qoldanystaǵy abattandyrý qaǵıdasy tıisti deńgeıde ázirlenbegen, sondyqtan oryndalýy aqsap tur. Budan bólek, qaǵıdada aýmaqtardy kútip ustaýǵa jáne tazalaýǵa baılanysty kóptegen másele eskerilmegen. Bul oraıda, Prezıdent Ákimshiligi tarapynan О́nerkásip jáne qurylys mınıstrligine abattandyrý erejesine ózgerister engizý jóninde naqty tapsyrma berildi. Jańa qaǵıdada menshik ıeleriniń jeke jáne irgeles aýmaqtardy kútip-ustaýy, eldi mekenderdiń jáne ǵımarattardyń syrtqy arhıtektýralyq kelbetin jaqsartý máseleleri qarastyrylýda. Sondaı-aq qys mezgilinde aýmaqtardy jınaý, qardy, muzdy jáne qoqysty jınaýdyń naqty merzimderi men ádisteri kórsetiledi. Bul jumystardy atqarýda turǵyndar men bıznes ókilderiniń qatysýyna basymdyq beriledi», dedi Erlan Isabekov.
Túrkistan oblysynda tazalyq naýqany aıasynda 1 408 is-shara ótkizilgen. Oǵan 2 156 memlekettik organ, 3 204 bıznes ókili, 74 myńǵa jýyq turǵyn atsalysqan. Sondaı-aq óńirde polısııa departamenti qurylymdarymen oblys aýmaǵyn abattandyrý qaǵıdalary men ortaq paıdalaný oryndaryn lastaý faktileriniń anyqtaý baǵytynda keshendi sharalar atqarylyp keledi. Jyl basynan beri Ákimshilik kodeksiniń 505 baby boıynsha 3 597 eskertý jasalyp, 139 tulǵaǵa ákimshilik aıyppul, al 10 614 tulǵaǵa qatysty ákimshilik quqyq buzýshylyq týraly hattamalar rásimdelip, 146 mln teńge aıyppul salynǵan. Ákimshilik kodeksiniń 630 baby boıynsha 2 920 tulǵaǵa qatysty ákimshilik quqyq buzýshylyq týraly hattamalar rásimdelip, 13 mln teńgeden astam aıyppul salynyp otyr. Ekologııa Kodeksi talaptarynyń saqtalýyna qatysty júrgizilgen 115 tekserý jumystarynyń nátıjesi boıynsha 478 ekologııalyq zań buzýshylyq anyqtalyp, 145 nusqama berilgen, 462 jeke jáne zańdy tulǵalarǵa ákimshilik aıyppul salynǵan.
Túrkistan oblysy