Ertis-Baıan óńiriniń isker azamattary shaǵyn jylyjaılar turǵyzýǵa bet bura bastaǵany baıqalady. Tirligi qysy-jazy jalǵasyp, el-jurt tabıǵı dárýmenderden taryǵa bastaǵan mezgilde sapaly kókónis pen jemis-jıdekti jergilikti naryqqa shyǵaratyn kásipkerlerdi qoldaý tetikteri de az emes. Esesine buǵan deıin qyrǵyz, ózbek aǵaıyndardan tasyp kelgen aýylsharýashylyq ónimderin ózimizde ósire bastadyq.
Aqsýdyń Alǵabas aýlynda jýyqta shaǵyn jylyjaı paıda boldy. Nebári 260 sharshy metr jerge jaıǵasqan keshen oblys ortalyǵynyń tutynýshylaryn arzan kókónis ónimderimen qaryq qylýdy kózdep otyr. Jylyjaı ıesi, «Tamyr-Kompanı» jeke kásipornynyń basshysy Darhan Álpeıisov alǵashqy maýsymda bul jerge qııar men qyzanaq, bolgar burshaǵyn, askók, shalǵam, pııaz ekkenin aıtady.
– Jylyjaıǵa tuqym men kóshetterdi ekkenime bir aıdan endi asty. Azyqtyq ósimdikterdiń kósheti jyly aýa raıyn jaqsy kóredi. Sondyqtan jylyjaıdy únemi jylytyp, birqalypty temperatýra ustalyp tur. Bul bızneske 12 mln teńge ınvestısııa quıdym. Onyń 5 mln teńgesin memleket grant retinde berse, ózgesi jeke qarajat. Barlyq qajetti tuqymdy jergilikti dúkenderden satyp aldym. Qazir sharýashylyǵymda eki qyzmetkerim bar. Olardyń sanyn aldaǵy ýaqytta tórteýge jetkizý josparda tur. Al ónim jınala bastaǵan ýaqytta maýsymdyq jumystarǵa qosymsha adam kúshi tartylady, – deıdi jas kásipker.
Darhannyń alǵashqy mamandyǵy – áskerı shtýrman. Aqtóbedegi áýe qorǵanysy salasynda áskerı ushaq shtýrmany bolyp biraz ýaqyt eńbek etken. Áskerı qyzmette 10 jyldaı júrip, Aıagóz, Almaty, Pavlodar qalalarynda bolypty. Kelisimsharty aıaqtalǵan soń kópten beri kókeıinde júrgen bıznes ıdeıasyn júzege asyrýǵa birden kirisip ketipti. Aıtýynsha, jylyjaı sharýashylyǵyn qurý, kókónisterdi egý ádis-tásilderiniń barlyǵyn ınternetten, áleýmettik jelidegi tanymal blogerlerden úırengen. Kóktep shyǵa bastaǵan kóshetterdi alǵashqyda qardy eritip, sonyń sýymen sýaryp kelgen. Aldaǵy kúnderi jylyjaı janynan qudyq qazyp, qajetti sýdy sodan tartyp shyǵarmaqshy. Eńbekqor azamat ónimi jaqsy shyqsa, aldaǵy ýaqytta bul jerge qulpynaı egip kórmekshi.
Sóz sońynda kásipker Pavlodar qalasyndaǵy saýda-sattyq núkteleri jylyjaıdyń bolashaq ónimine suranys jasap otyrǵanyn jetkizdi. Oblys ortalyǵyndaǵy «Jailau» fermerlik bazarynda jáne «Rahat» kóterme-bólshek bazarynda satý kózdelgen. Bolashaqta sharýashylyǵy keńeıe tússe, elimizdiń ońtústigi men Qyrǵyzstannan tasylatyn kókónis ónimderiniń bir bóligin qamtamasyz etý josparynda bar.
Pavlodar oblysy