Úkimette Premer-mınıstrdiń orynbasary Tamara Dúısenovanyń tóraǵalyǵymen kolledj ben joǵary oqý oryndarynyń stýdentterin jataqhanamen qamtý máselesi qaraldy, dep jazady Egemen.kz.
Ǵylym jáne joǵary bilim vıse-mınıstri Talǵat Eshenqulovtyń bıyl 10 576 orynǵa shaqtalǵan 27 jataqhanany qoldanysqa berý josparlanǵanyn aıtty. Onyń 19-y joǵary oqý oryndaryna, 8-i kolledjderdiń stýdentterine paıdalanýǵa beriledi.
«Qazirde 1540 orynǵa arnalǵan 7 jataqhanada tıisti jumystar tolyǵymen aıaqtalyp, keler oqý jylyna stýdentterdi qabyldaýǵa ázir. Qurylys nemese rekonstrýksııa jumystaryn júrgizý boıynsha oblystar men respýblıkalyq mańyzy bar qalalarda jol kartalary daıyndaldy. Josparlanǵan nysandardyń deni qyrkúıekke deıin paıdalanýǵa berilmek», dedi Talǵat Eshenqulov.
Qazir jataqhana qurylystaryndaǵy jumystyń 75 paıyzy aıaqtalǵan. Al úsh nysandaǵy tıisti jumystar 50% shamasynda atqarylǵan. Olar Almaty qalasy men Aqmola, Qyzylorda oblystaryna tıesili. О́z kezeginde óńir ákimderi stýdentterge arnalǵan úılerdi ýaqtyly aıaqtaýǵa ýáde berip otyr.
«Qurylys maýsymynyń ýaqyty shekteýli. Sondyqtan jaýapty mınıstrliktermen qatar oblys ákimdikteri jumystyń ýaqtyly ári sapaly atqarylýyn turaqty túrde qadaǵalaýy kerek. Nysandardaǵy qurylys, rekonstrýksııa sharalarynyń qarqynyn apta saıyn qarastyratyn bolamyz. Bul jumysqa jeke kásipkerlerdiń qyzyǵýshylyǵy joǵary ekeni baıqalady. Sol sebepti jataqhana salýǵa nıetti bıznes ókilderine qajetti jaǵdaı jasaýǵa qatysty sharalardy qarastyrý qajet», dedi Tamara Dúısenova.