Búgingi qoǵamdy alańdatyp otyrǵan qylmystyń biri – alaıaqtyq. Aramza iske bel býyp, ózgeniń mańdaı terimen tapqan tabysyn óz paıdasyna jaratatyn alaıaqtar aıylyn jımaı tur.
Atyraý qalalyq polısııa basqarmasy tergeý bólimi bastyǵynyń orynbasary Aıbek Násıevtiń deregine qaraǵanda, jyl basynan beri alaıaqtardyń zańsyz áreketinen jergilikti jáne ózge óńirlerdiń 200-ge jýyq turǵyny alaıaqtardyń qurbany bolǵan. Tergeý kezinde alaıaqtyq qylmysqa baılanysty quqyq buzýshylyqtyń birneshe túri anyqtalyp otyr.
«Birinshiden, alaıaqtar arzan baǵaǵa memlekettik baǵdarlamalar arqyly kópqabatty úılerden páter men jer telimderin alyp berýdi usynady. Ekinshiden, jeke kásiporyndarǵa, onyń ishinde munaı óndirý kompanııalaryna, merdigerlik mekemelerge jumysqa ornalastyrýǵa ýáde beredi. Úshinshiden, zeınetaqy qorynda jınalǵan qarjyny alyp berý týraly usynyspen shyǵady. Tórtinshiden, memleketten sýbsıdııa alý maqsatynda «Damý» qory arqyly qomaqty nesıe alyp beretinine sendiredi. Osyndaı alaıaqtyq quqyq buzýshylyqqa qatysty 300-ge jýyq qylmystyq is sotqa joldandy», deıdi A.Násıev.
Onyń aıtýynsha, turǵyndar alaqtardyń arbaýyna túspeý úshin birneshe keńesti eskerýge tıis. Birinshiden, joǵaryda kórsetilgen syltaýlarmen aqsha suraǵan beıtanys jandardyń banktik esepshotyna qarjy aýdarmaǵan jón. Ekinshiden, ǵalamtor jelisindegi jarnamalardy aldymen tekserip, zańdylyǵyna kóz jetkizý kerek. Úshinshiden, elimizde jumysqa ornalastyratyn resmı organdar azamattardan aqsha almaıtynyn udaıy jadyda ustaý qajet.
Al oblystyq polısııa departamenti tergeý basqarmasynyń asa mańyzdy ister jónindegi aǵa tergeýshisi Muratbaı Qadyrovtyń aıtýynsha, atyraýlyq úleskerler 3 jylda úı qurylysyna 5 mlrd teńgege jýyq aqsha salǵan. Biraq úleskerlerge páter de berilmegen, aqshasy da qaıtarylmaǵan. Demek olar alaıaqtyq árekettiń kesirinen aldanyp otyr.
«Tergeý basqarmasynyń óndirisinde isterdi zerdelegende, sońǵy 3 jylda turǵyn úı qurylysyna paı jáne úleskerlik qatysý arqyly páter alýǵa 500-ge jýyq turǵynnyń qyzyǵýshylyq tanytqanyn baıqadyq. Turǵyndar «Jibek joly», «Aqmarjan-Atyraý», «Baisanat Residence», «Saraishyq», «Qazanat», «Family Town» turǵyn úı keshenderiniń qurylysyna salymshy bolǵany anyqtaldy. Salymshylarǵa 5 mlrd teńgege jýyq materıaldyq shyǵyn keltirilgen. О́kinishke qaraı, úlesker bolǵan turǵyndar osy kúnge deıin qurylysy aıaqtalǵan páterdi nemese aqsha qarajatyn ala almaı júr. Úleskerlerdiń aldaný deregimen 6 qylmystyq is tirkeldi», dedi M.Qadyrov.
Polısııa qyzmetkerleri alaıaqtyq árekettiń kóbeıýine baılanysty Atyraý turǵyndaryna turǵyn úı keshenderinen páter alý úshin qarajat salý kezinde eskeretin birneshe keńesti usynyp otyr. Birinshiden, turǵyn úı kesheniniń qurylysyn júrgizetin kompanııada memlekettik organdardyń ruqsat qujaty bar-joǵyna kóz jetkizý kerek. Ekinshiden, kúmándi sharttardan bas tartqan jón.
Alaıaqtyq jasqa qaramaıtyn qylmys túrine aınalyp barady. Buǵan mysal retinde qarjy pıramıdasyn qurǵan atyraýlyq zeınetker áıeldiń áreketin aıtýǵa bolady. Zeınetker qarjy pıramıdasyn quryp, 5 jábirlenýshige 4 mln teńge shyǵyn keltirgen. Jaqynda Atyraý qalasynyń №2 sotynda Qylmystyq kodekstiń 217-baby 2-bóliginiń 1-tarmaǵymen aıyp taǵylǵan zeınetkerge qatysty qylmystyq is qaraldy.
«Sottalýshy adamdar tobynyń aldyn ala sóz baılasýymen qarjy pıramıdasynyń qurylymdyq bólimshesin qurǵan. Salymshylardy tartý maqsatynda keńseni jalǵa alyp, onda kún saıyn úgit-nasıhat júrgizip, jarnamalyq bannerler ilgen. Osylaısha, kásipkerlikke qarajat tartpaı, basqalardyń jarnasy esebinen keıbir qatysýshylardy baıytý jolymen osy aktıvterdi tartýdan múliktik paıda alý qyzmetin uıymdastyryp, basqarǵany anyqtaldy», dep habarlady oblystyq sottyń baspasóz qyzmeti.
Zeınetker kinásin tolyq moıyndap, jábirlenýshilermen tatýlasýyna baılanysty ózin qylmystyq jaýaptylyqtan bosatýdy surady. Al jábirlenýshiler sottalýshyny qylmystyq jaýaptylyqtan bosatyp, qylmystyq isti toqtatýdy usyndy.
«Qylmystyq jaýaptylyq pen jazany jeńildetetin mán-jaılar retinde sottalýshynyń zeınetkerlik jasy, jábirlenýshilerge keltirilgen zalaldy óz erkimen tolyqtaı ótegeni eskerildi. Jazany aýyrlatatyn mán-jaılar anyqtalmady. Sottalýshy Qylmystyq kodekstiń 217-babynyń 2-bóliginiń 1-tarmaǵymen kináli dep tanyldy. Oǵan belgili bir qyzmetpen aınalysý quqyǵyn 3 jyl merzimge, bas bostandyǵyn 3 jyl merzimge shekteý túrindegi jaza taǵaıyndaldy», dep málim etti sottyń baspasóz qyzmetinen.
Atyraý oblysy