Ofıserler qatary tolyqty

Is-sharaǵa Qorǵanys mınıstrligi­niń, Ulttyq qaýipsizdik komıtetiniń, Ishki ister mınıstrliginiń, Tótenshe jaǵdaılar mınıstrliginiń basshylyǵy, áskerı oqý oryndarynyń basshylyq quramy, Qarýly kúshterdiń ardagerleri, kýrsanttar men túlekterdiń týystary qatysty. Saǵadat Nurmaǵambetov atyn­daǵy Qurlyq áskerleri áskerı ıns­tı­tý­tynyń túlekteri Baýyrjan Alpys­baev pen Imanjúsip Asylbekov, Radıo­elektronıka jáne baılanys áskerı-ınjenerlik ınstıtýtynyń túlekteri Bekjan Daıyrbaı men Dıas Omar Prezıdent Qasym-Jomart Toqaevtyń qolynan ofıserlik pogondardy alý múmkindigine ıe boldy.

– Áskerı ınstıtýttan «Injenerlik qamtamasyz etý» baǵdarlamasy boıyn­sha bilim aldym. Ýaqyt tez ótip ketti. En­di qyzmettiń jańa kezeńi bas­talady. Leıtenanttyq pogondy Qarýly kúsh­ter­diń Joǵarǵy Bas qolbasshysynyń qo­lynan alýdyń jaýapkershiligi joǵary. Maǵan kórsetilgen bul senimdi aqtaýǵa tyrysamyn, – dedi túlek I.Asylbekov.

Aıta ketý kerek, pogondardy saltanatty túrde tapsyrý rásimine úzdik­ter­diń úzdikteri keldi. Olardyń arasyn­­da halyqaralyq pándik olımpıada­­lar­dyń júldegerleri, sport sheberleri bar.

Qorǵanys mınıstri, general-polkovnık Rýslan Jaqsylyqov oqý úzdikteri, Qurlyq áskerleri áskerı ınstıtýtynyń túlekteri Danııar Ǵabıden men Tımýr Qazısovke, Radıoelektronıka jáne baılanys áskerı-ınjenerlik ınstıtýtynyń túlekteri Almaz Dúısenbaev pen Qanat Muratovqa leıtenant pogondaryn tapsyrdy.

– «Áskerı istegi kıberqaýipsizdik» mamandyǵyn aldym. Oqý barysynda baǵdarlamalaýdy meńgerdim. Bıyl TMD elderi arasynda aqparattanýdan ótken halyqaralyq olımpıadaǵa qaty­sý biz úshin mańyzdy oqıǵa boldy. Onda júldeli orynǵa ıe boldyq. Árıne, men leıtenant pogonyn Qorǵanys mı­nıstriniń qolynan alǵanyma qýanysh­tymyn. Bul – úlken senim. Sol senimdi aq­taýǵa tyrysyp, adal qyzmet etemin, – dedi leıtenant A. Dúısenbaev.

Sonymen birge Qorǵanys mınıstri Sh. Ýálıhanov atyndaǵy áskerı kolledj­diń túlekteri Álisher О́telbaev pen Beglan Temirhanǵa, armııa generaly S.Nurmaǵambetov atyndaǵy áskerı kol­ledjdiń túlekteri Maqsat Azyqanov pen Nurbol Jumabaıǵa da kishi serjant pogondaryn tabys etti.

General-polkovnık Rýslan Jaq­sy­lyqov túlekterdi tarıhı oqıǵamen qut­tyqtap, Otanyna adal qyzmet etýge tilek bildirdi.