UBT úzdikteri

Bolashaq muǵalim

Elimizde negizgi UBT-nyń bastalǵanyna úsh apta boldy. Ázirge testileýdiń barlyq 140 suraǵyna jaýap berip, birde-bir suraqtan múdirmegen úmitker kezdespedi. Al osy ýaqyt aralyǵynda tapsyr­ǵan­dardyń eń joǵarysy 138 ball bolyp tur. Mundaı nátıje – Túrkistan oblysyna qarasty Kentaý qalasyndaǵy jekemenshik mekteptiń oqýshysy Qojanov Aıdos Haırýllaulynyki. Aıdos 10 jyl boıy № 16 Iýrıı Gagarın atyndaǵy mektep-lıseıinde oqyp, 11-synypta «Kentaý-Grant» jekemenshik mektebine aýysqan eken. Keıipkerimiz jyl boıy mekteptegi UBT-nyń baıqaý synaqtarynda 1-oryndy bermeı kelipti.

– Aıdostyń eń basty erek­sheligi – onyń taban­dylyǵynda. Ol óte tártipti, bul jerde oqýǵa, izdenýge degen temirdeı tár­tip­tiń ıesi ekenin meńzep otyr­myn. Sonymen qatar ózine joǵary talap qoıa biledi, tań­ǵy 7-den túngi ýaqytqa deıin ta­ban aldyrmaı josparlaǵan iste­rin oryndaýǵa bar zeıinin aýda­ra­dy, ózin únemi qadaǵalap otyrady. Adamı qasıetterine kelsem, jaqyn­daryna janashyr, synyp­tas­taryna meıirimdi, test tal­daýlarynda óziniń bilgenin qur­dastaryna jan-jaqty túsindirip berýden jalyqpaıdy. Jalpy, mektepte de, synypta da óz ornyn taba bilgen oqýshy, – deıdi ustazy Elmurat Dosymov.

Janashyr joldas

Redaksııamyzǵa oqyrmandar tarapynan sý basqan óńirlerdegi túlekterge UBT-da qan­daı da bir jeńildikter bar-joǵyn surap habar­lasqandar boldy. Tótenshe jaǵdaıdyń sebe­binen úmitkerler testileýge daıyndalatyn bi­r­neshe kúnin joǵaltyp alǵan shyǵar, biraq bul talapty da talantty talapkerge toqtaý emes eken. Oǵan dálel – negizgi UBT-dan 137 ball alǵan Aqtóbe qalasyndaǵy Márııa Qur­manǵalıeva atyndaǵy №32 mektep-gımnazııa túlegi Aıshat Saǵynaeva. Keıip­keri­mizdiń synyp jetekshisi Gúljazıra Nurly­bekqyzy Aıshattyń bilimge júırik qana emes, joldas­taryna janashyr ekenin jetkizdi.

– Aıshat bizdiń mektepke 7-synypta aýysyp keldi. Sol kezden beri oǵan qazaq tili men ádebıetinen sabaq beremin. Ol – óte zerek, jan-jaqty oqýshy, «Altyn belgige» úmitker. Onyń bar ynta-jigeri bilim alýǵa shoǵyrlanǵan, óziniń baıypty, sabyrly minezimen osyndaı nátıjege qol jetkizip otyr. Aıshat oqýda ozat bolýymen qatar, adamı qasıetteri de joǵa­ry. Jalǵyz ózi ǵana úzdik bolýdy kózdemeı, sy­nypta taqyrypty túsinbeı qalǵan, oqyp úlger­meı jatqan joldastaryna kádimgideı ýaqytyn bólip, túsindirip, kómektesip oty­ra­dy. Shákirtim kóbine osy qazaq tili men ádebıeti­nen shyǵarmashylyq baıqaýlarǵa, atap aıtqan­da, esse jazý, Abaıtaný olımpıada­laryna, Ábish Kekilbaıuly oqýlary saıysyna qatysty, – dedi G.Nurlybekqyzy.

Muǵalimniń aıtýynsha, keıipkerimiz – debat týrnırleriniń de úzdigi. Ol respýblıkalyq debat týrnırinen 1-oryndy jeńip, mınıstrdiń qolynan marapat alǵan.

Jan-jaqty jan

UBT úzdiginiń biri – Pavlodar oblysyna qarasty Aqsý qalasynda ornalasqan Qanysh Sátbaev atyndaǵy daryndy balalarǵa arnalǵan mamandandyrylǵan gımnazııanyń oqýshysy Aıbat Sýatuly О́mirzaq. Keıipkerimiz negizgi ulttyq biryńǵaı testileýden 137 ball jınaǵan. Synyp jetekshisi Qarlyǵash Muhtarqyzy Aıbattyń únemi izdeniste júretinin jetkizdi.

– Aıbat bizdiń gımnazııada 1-synyptan bastap oqıdy. Ol – sabyrly, meıirimdi, ba­ıypty, adamdarmen tez til tabysyp ketetin, synyptastarynyń arasynda bedeldi oqýshy. Únemi izdeniste júredi, geografııa pánine degen qyzyǵýshylyǵy óte zor. Shákirtimiz óziniń, ustazdarynyń eńbegi nátıjesinde UBT-da joǵary nátıjege qol jetkizip otyr. Mekteptegi is-sharalarǵa belsendi qatysyp qana qoımaı, mektep ómirine jaýapkershilikpen qaraıdy. Uıymdastyrýshylyq qabiletin erekshe atap ótýge bolady. Mekteptegi voleıbol, fýtbol, týrızm komandasynyń beldi múshesi. Aıbat – kópbalaly otbasynan shyqqan tárbıeli bala. О́zi ádebı kitaptar oqyǵandy unatady, bilimin jan-jaqty jetildirip jú­redi. Aıbattyń bolashaǵy jarqyn bolatynyna senemin, – deıdi muǵalimi Q.Muhtarqyzy.

Osy oraıda biz keıipkerlerimizben taqy­rypqa tuzdyq retinde az-kem áńgimelesip, bárine birdeı suraq qoıdyq, balasy test tapsyratyn ata-analar, muǵalimder, talapkerlerge paıdaly bolady degen úmitpen jaýaptaryn  usynamyz.

BLIS-SUHBAT

«Egemen Qazaqstan»: Qaı ma­mandyqty tańdadyńyz?

Aıdos QOJANOV: Men «matematıka pániniń muǵalimi» mamandyǵyn tańdadym.

Aıshat SAǴYNAEVA: Men bolashaqta IT salasynyń mamany bolǵym keledi. Aldaǵy ýaqytta IT salasynyń myqty mamany retinde elimniń damýyna úles qosýdy qalaımyn.

Aıbat О́MIRZAQ: «Menedj­ment jáne basqarý» mamandyǵyn tańdap otyrmyn. Bolashaqta osy salada eńbek etkim keledi.

«Egemen Qazaqstan»: Qandaı joǵary oqý ornynda oqýdy qalaısyz?

Aıdos QOJANOV: Almatyda bilim alýdy qalaımyn, biraq áli ýnıversıtetti tańdamadym.

Aıshat SAǴYNAEVA: IT salasy boıynsha mamandyqqa Almaty qalasyndaǵy Súleımen-Demırel atyndaǵy ýnıversıtette oqýdy kózdep otyrmyn.

Aıbat О́MIRZAQ: Astana qalasynda Maqsut Nárikbaev ýnıversıtetine túsýdi josparlap otyrmyn.

«Egemen Qazaqstan»: UBT-dan úzdik bolýdyń syry nede? Úmkitker-zamandastaryńyzǵa qandaı keńes berer edińiz?

Aıdos QOJANOV: UBT-dan úzdik bolýdyń syry – turaq­tylyqta. Qandaı da bir nárseden joǵary nátıjege qol jetkizý úshin sol nársemen únemi, turaqty aınalysý qajet. UBT tapsyratyn túlekterge aıtarym: qobaljymańdar, óz­derińe ǵana senińder, ár kúnderińdi jos­parlańdar.

Aıshat SAǴYNAEVA: Me­nińshe, UBT-dan joǵary ball alý kez kelgen úmitkerdiń qoly­nan keledi. Eń bastysy, eńbek­te­nip, durys maqsat qoıa bil­se bolǵa­ny. Joǵary nátıje kór­setýde bilim alǵan mek­te­bim maǵan úlken qoldaý kórsetti. Adamnyń bilim bazasyn qalyptastyra­tyn – mektep. Osy oraıda mek­te­bi­me, sabaq ber­gen muǵalimderime alǵys aıtamyn! Testileýge daıyndyqty 10-synyptan bastadym. Daıyndalý­da mekteptiń bilimimen shekte­lip qoımaı, qosymsha onlaın kýrstarǵa qatystym. Talapker za­mandastaryma esh ýaıymda­maı, alǵa durys maqsat qoıa bilýge, ­sol maqsattyń jolynda eńbek etýge keńes beremin.

Aıbat О́MIRZAQ: UBT-da úzdik bolýdyń syry – tabandy eńbek pen tózimdilik. Tek kóp eńbektenip, joǵary nátıjege jetýge bolady. Árıne, bul jolda gımnazııamnyń sińirgen eńbegi ól­sheýsiz. Bolashaq túlekterge daıyndyqty erte bastap, bir­ge daıyndalatyn dos taýyp, barlyq ýaqytty oqýǵa arnaýǵa shaqyramyn.

«Egemen Qazaqstan»: Osyǵan deıingi synaq testileýlerde qan­sha ball jınadyńyz?

Aıdos QOJANOV: Qań­tar­daǵy UBT-da – 132, naýryzda 122 ball jınadym.

Aıshat SAǴYNAEVA: Qań­tardaǵy UBT-da – 121, naýryzda 133 ball aldym.

Aıbat О́MIRZAQ: Qańtardaǵy UBT-da – 113, naýryzda 124 ball jınadym.