Oıyl, Jem jáne Jaıyq ózenindegi sý deńgeıi tómendegenimen, onyń zardaby áli tolyq joıylǵan joq. Tasqyn sýdyń saldarynan keıbir bilim ordalary sabaqty onlaın rejimde ótkizýge májbúr boldy.
Atyraý oblystyq bilim basqarmasy mektepke deıingi jáne orta bilim berý bóliminiń bas mamany Dına Stamǵalıdyń aıtýynsha, Oqý-aǵartý mınıstrliginiń sheshimime sáıkes Mahambet aýdanynda barlyq mekteptiń, Jylyoı aýdanyndaǵy 4 bilim ordasynyń oqýshylary aralyq jáne qorytyndy emtıhandardan bosatyldy. Alaıda 11-synyp oqýshylary UBT tapsyrýdan bosatylǵan joq. Al 9-synypty bitirgennen keıin oqýyn kolledjde jalǵastyrýǵa nıetti oqýshylar qabyldaý emtıhanyn tapsyrýy kerek.
Oblystyq bilim basqarmasy baspasóz qyzmetiniń málimetinshe, bıylǵy oqý jylyn 204 mekteptiń 149 187 oqýshysy aıaqtady. Onyń ishinde 9-synyptyń 12 700 oqýshysy bar. Bilim ordalaryndaǵy 11-synypty 6 myńǵa jýyq túlek bitiredi. Bilim ordasymen qoshtasatyndardyń arasynda 125 túlek «Altyn belgi», al 329 oqýshy «Úzdik attestat» alýǵa úmitti.
Jylyoı aýdandyq bilim bóliminiń basshysy Gúljansara Tańatarovanyń málimetinshe, munda jalpy bilim beretin 20 orta mektep bar. Mekteptiń deni Tasqyn sýdan zardap shekken Qulsary qalasynda ornalasqan.
«Bıyl aýdandaǵy bilim ordalaryn 684 túlek bitiredi. Al 9-synypty bitiretin 1606 oqýshy bar. Bul oqýshylardyń 30 paıyzy oqýyn kolledjderde jalǵastyrýǵa uıǵarym jasady. Mektep bitiretin túlekterdiń basym bóligi UBT tapsyrýǵa sheshim qabyldap otyr. Qazir 617 túlek UBT tapsyrý úshin ótinish berdi. Bir túlek densaýlyǵyna baılanysty Atyraý oblystyq bilim basqarmasy basshysynyń buıryǵymen memlekettik emtıhannan bosatyldy», deıdi Gúljansara Tańatarova.
Bilim basqarmasynyń baspasóz qyzmeti málim etkendeı, 5252 túlek UBT tapsyrýǵa ótinish berip otyr. Atyraý jáne Qulsary qalasynda UBT pýnktteri bar. Tasqyn sýdan zardap shekken oblystardyń birinde turǵanymen, atyraýlyq túlekter ózge óńirlerdegi qatarlastary sekildi barshaǵa ortaq tártippen UBT tapsyrady.
Bul oraıda munaıly óńir túlekterine alabóten jeńildik jasalyp otyrǵan joq. Degenmen Ǵylym jáne joǵary bilim mınıstrligi Prezıdent Qasym-Jomart Toqaevtyń tapsyrmasyna sáıkes H.Dosmuhamedov atyndaǵy Atyraý ýnıversıtetinde Qazaqstan joǵary oqý oryndarynyń aýqymdy kórmesin ótkizdi. Maqsat – Atyraý oblysynyń jastaryna bólingen nysanaly bilim granttary týraly aqparat berý. Kórmege alǵashqy kúni aqparat alýǵa 2 myńǵa jýyq talapker keldi.
«Atyraý oblysynyń talapkerleri úshin 1200 bilim granty bólindi. Bıyl mamandyqtardyń sany artyp, bilim granttary 9 baǵytty qamtyp otyr. Atyraý óńiriniń túlekteri úshin mamandyq tańdaýdyń múmkindigi kóbeıdi. Bul kórmede bilikti mamandar talapkerlerge mamandyqty sátti tańdaýdyń jolyn kórsetip, naryqtaǵy suranysqa ıe salalar týraly keńes berdi. Joǵary oqý oryndary týraly tolyqqandy málimet usyndy», dedi mınıstrdiń keńesshisi Rýslan Emelbaev. Onyń aıtýynsha, mınıstrlik batystaǵy, sondaı-aq halyq tyǵyz qonystanǵan, jańadan qurylǵan óńirlerdiń talapkerlerine 5 myń grant bólip otyr. Osyǵan baılanysty Atyraýdaǵy kórme aıasynda «Grant túrleri jáne talapkerdiń jol kartasy» taqyrybyndaǵy kásibı baǵdar berý semınary ótti.
Atyraý oblysy