Baıanaýyldaǵy Jasybaı kóliniń jaǵasy týrısterdi qabyldaýǵa daıyn. Aldaǵy senbi, 15 maýsymnan bastap demalys aımaǵynda jazǵy týrıstik kezeń ashylady dep kútilip otyr.
Baıanaýyl kýrorttyq aımaǵynda bir demde 5 myń adam demala alatyn 50-den asa týrıstik nysan bar. Taýly ólkede 13 negizgi týrıstik marshrýt jáne 68 kórneki oryn jumys isteıdi. Byltyr Jasybaı demalys aımaǵyna shamamen 120 myń adam kelgen.
Pavlodar oblysy ákimdiginiń aqparynsha, týrıstik salany damytý jónindegi 2028 jylǵa deıingi óńirlik baǵdarlamasy bekitildi. Onda 8,5 mlrd teńgege 17 ınvestısııalyq jobany jáne 12,3 mlrd teńgege 7 ınfraqurylymdyq jobany iske asyrý is-sharalary kózdelgen. Baıanaýyldaǵy týrıstik áleýetti odan ári damytý úshin Pavlodar oblysynyń ákimdigi men ERG arasyndaǵy ózara yntymaqtastyq týraly memorandým sheńberinde 3 jobanyń smetalyq qujattamasy ázirlendi. Olar Baıanaýyl kentinde ekinshi dúnıejúzilik soǵys batyrlaryna arnalǵan stella boıyndaǵy jaıaý-serýendeý aımaǵyn qaıta jańartý, Sabyndykól kóliniń jaǵalaýy men jaǵajaıyn qaıta jańartý, týrısterge arnalǵan mýzeıi bar ortalyq salý. Buǵan qosa aýdanda dene shynyqtyrý-saýyqtyrý ortalyǵyn ashý kózdelgen. Keleshekte aýdan ortalyǵynda shańǵy-rollerlik trassa, shıpajaı salý, hosteli bar iri zamanaýı janarmaı quıý stansasyn turǵyzý sııaqty josparlar da bar.
Týrıstik maýsymnyń ashylýynda anımatorlar, qolónershiler shaqyrylyp, sporttyq jáne mádenı is-sharalar bolady. Jaǵajaı voleıboly, arqan tartý sııaqty jarystar ótkizilip, ulttyq oıyndar oınatylady. Negizgi baǵdarlamadan bólek tórt ekskýrsııalyq baǵyt bar, sapserfıng boıynsha jappaı súńgý, avtobýstyq ekskýrsııa, jaıaý saıahat, djıp-týr. Kempirtas, Toraıǵyr kóli, Saımantas, Qońyr áýlıe, Eski ótkel sııaqty jerler kórsetiledi.
Pavlodar oblysy,
Baıanaýyl aýdany