Dál osy kúnderi álemge áıgili Netflix platformasy Qyrǵyzstan men Qazaqstan elderiniń kórikti mekenderindegi reality travel show túsirilimderin aıaqtap qaldy. Netflix-tiń osynaý tańdaýy – eldiń tanylýy men týrıstik áleýetin arttyrýǵa yqpal etetin mańyzdy oqıǵa, tipti olja dese bolady.
Atalǵan platformanyń aýdıtorııasy orasan, búkil álem boıynsha jarty mıllıardtan asatyn qoldanýshylaryna fılmder, serıaldar ǵana emes, ózge de túpnusqa kontenttiń keń aýqymyn usyna alady ári óte tanymal. Platformanyń aqyly jazylýshylarynyń ózi shamamen 270 mıllıonǵa jetip jyǵylatyn bolsa, álemdik oıyn-saýyq ındýstrııasyndaǵy eń yqpaldy kompanııalardyń biri óziniń reality travel show úshin Almatynyń ádemi taýlary men qyrǵyzdyń tabıǵatyn tańdaǵan.
Jalpy, jaz maýsymynda Almatyǵa kelimdi-ketimdi meıman kóbeıe túsetini belgili. Týrızmdi damytý maqsatynda megapolıste engizilip jatqan jańalyq az emes.
Máselen, endigi jerde shahardyń týrıstik nysandaryna qydyrǵan kezde qaltańyzdaǵy qarjyny 63%-ǵa deıin únemdeýge múmkindik beretin – Almaty Pass biryńǵaı bılet iske qosyldy. Árbir týrıstik nysanǵa jeke-jeke saıahattaǵannan góri, Almaty Pass bıleti áldeqaıda tıimdi. Mysaly, biryńǵaı bılettiń quny 9 990 teńgeden bastalsa, oǵan bólek-bólek ekskýrsııaǵa barǵanda 27 300 teńge jumsalatyn nysandar kiredi.
Qysqasy, Almaty Pass júıesine – «Kóktóbe» aspaly joly, «Kóktóbe» saıabaǵyndaǵy aınalma jol jáne jyldam túsý (Fast Coaster), MEGA Alma-Ata SOO aýmaǵyndaǵy Happy Eye sholý dóńgelegi, Almaty haıýanattar baǵy, Á.Qasteev atyndaǵy óner mýzeıi, «Medeý-Shymbulaq» baǵytyndaǵy Shymbulak aspaly joly, Botanıkalyq baq pen qalany aralatatyn Nur Bus avtobýs týry kiredi.
Qala qonaqtary biryńǵaı bıletti almaty.citypass.kz resmı veb-saıtynan satyp alǵan kezde, osy saıtta nemese mobıldi qosymshada QR kody bar vaýcher paıda bolady. QR kod qyzmet paketine baılanysty nysanǵa birinshi kelgen sátten bastap 24 nemese 72 saǵat ishinde jaramdy.
ALMATY