El gazeti «Egemen Qazaqstannyń» 95 jyldyq bıiginde basylymnyń beldi jýrnalısteri de marapattalýda. Taıaýda gazet sholýshysy Suńǵat Álipbaı «О́skemen qalasynyń qurmetti azamaty» atandy. Jýrnalıske qurmetti ataqty qala ákimi Temirbek Qasymjanov tabys etti.
– Meniń jýrnalıstik jolym óte baı. Sebebi, alǵashqy eńbek jolymdy aýdandyq gazetten bastadym. Jýrnalıstik ǵumyrymda aýdannan respýblıkalyq deńgeıge deıingi baspaldaqty júrip óttim. О́zimdi baspasóz salasyndaǵy baqytty jandardyń qataryna jatqyzamyn, – dedi S.Álipbaı.
Ol aýdandyq gazette tilshi, bólim meńgerýshisi, aýdandyq radıo habarlaryn uıymdastyrýshy, Shyǵys Qazaqstan oblystyq «Kommýnızm týy» gazetiniń Zaısan, Marqakól, Kúrshim aýdandary boıynsha menshikti tilshisi, oblystyq gazettiń redaksııa apparatynda tilshi, aǵa tilshi, ekonomıka bóliminiń redaktory boldy. Keıinnen «Egemen Qazaqstan» respýblıkalyq gazetiniń ekonomıkalyq sholýshysy retinde kóptegen taldamalyq maqalalar jazyp, túrli halyqaralyq, respýblıkalyq baıqaýlardyń jeńimpazy atandy.
Oqyrmandar qarymdy qalamger, júırik jýrnalıst dep biletin áriptesimiz óziniń jastyq shaǵy ótken, jýrnalıst retinde qalyptasqan О́skemen shahary árdaıym júreginiń buryshynda turatynyn jetkizip, jerlesteriniń ystyq yqylasy úshin rızashylyǵyn bildirdi.
Dýman ANASh,
«Egemen Qazaqstan».
О́SKEMEN.