Shymkentte erekshe kútimdi qajet etetin balalarǵa arnalǵan psıhonevrologııalyq medısınalyq-áleýmettik mekeme ashylyp, balalardy qabyldaı bastady. Kúndizgi jartylaı stasıonar 50 orynǵa laıyqtalǵan.
Adam taǵdyryn surap almaıdy. Bul balaqaılardyń syrt kózge súıeldeı kórinip, tar bólmede qamalyp otyratyndaı jazyǵy joq. Olar da bar múshesi túgel, aqyl-esi bútin qurdastaryndaı jaqsy ómir súrýge quqyly. Bul týraly ǵımaratty ashý saltanatynda oblys ákiminiń orynbasary Erlan Aıtahanov qadap aıtty.
– Osy jańa medısınalyq mekemeniń ashylýy kóptegen balalar men olardyń ata-analaryn qýanyshqa keneltedi dep oılaımyn. Osy sanattaǵy balalardyń sany jáne olardyń ata-analarynyń suranysyn eskere otyryp, byltyr oblys qazynasynan atalmysh ǵımarattyń qurylysyna 152,7 mıllıon teńge bólingen. Endi, mine, erekshe kútimdi qajet etetin balaqaılar Elbasy qamqorlyǵynyń jemisin kóredi, – dedi ol.
Munda 1 jastan 18 jasqa deıingi balalardyń em alýyna, bilim alýyna múmkindik bar. Al órkenıetti elderde bul másele túbegeıli sheshilgen.
Denesinde, aqyl-esinde aqaýy, múkistigi bar adamdar múmkindiginshe qoǵamdyq jumyspen qamtylady, barlyq ortada erkin júre alady. Mine, sondaı jaqsylyqtardy bizdiń balalar da kóre bastady.
Baqtııar TAIJAN,
«Egemen Qazaqstan».
ShYMKENT.