Eldiń eń iri astyqty óńirleriniń biri – Soltústik Qazaqstan oblysyna kóktemgi egis jumysynyń barysymen tanysýǵa Aýyl sharýashylyǵy mınıstri Aıdarbek Saparov jumys saparymen keldi. Mınıstr saparyn oblys ákimi Ǵaýez Nurmuhametovpen birge Ǵ.Músirepov aýdanynyń astyqty alqaptaryn kórýden bastady.
Mundaǵy «Nursen Agro», «Polýdenskıı» JShS-larynyń egis alqabymen tanysqan mınıstr aýa raıynyń qolaısyzdyǵyna qaramaı egis jumystarynyń óz ýaqytynda júrgizilip jatqanyn kórdi.
«Kóktemniń bir kúni – jylǵa azyq» degendi halqymyz beker aıtpaǵan, árbir jaıly kúndi barynsha tıimdi paıdalanyp qalýǵa tyrysyńyzdar. Qazir búkil el Memleket basshysymen birge sizderge qarap, sizderdiń jumystaryńyzdyń sátti bolýyn tilep otyr», dedi ol dıqandarmen kezdeskende. Oblys basshysy aýyl sharýashylyǵy qurylymdarynyń keshegi tasqyn sýyna qarsy kúreste kóp kómek jasaǵanyn eske alyp, eńbekterine jemis tileıtinin aıtty.
«Oblystaǵy «Zenchenko ı K», «Noǵaıbaı» JShS sııaqty ozyq sharýashylyqtardyń qatarynda sizdiń sharýashylyqtaryńyz da óziniń qoldan kelgen kómegin kórsetti. Barlyǵy 360 agroqurylym sý apatymen kúreste kómegin jasady», dedi.
Mınıstr eshki ósirýmen aınalysatyn Svetlana Karabanovanyń fermasynda da bolyp, eshki sútinen birneshe túrli ónim alyp, naryqqa shyǵaryp otyrǵan isker áıeldiń tájirıbesimen tanysty.
«Eshki súti – eń taza ónimniń biri. Onyń emdik qasıeti de kúshti. Qoı bastaǵan eshkiler shóptiń nárlisin, jemniń dámdisin aldymen jeıdi», deıdi S.Karabanova.
Oblys ákimdiginde ótken jıynda Memleket basshysynyń tapsyrmasyna sáıkes aýyl sharýashylyǵy jalpy óniminiń kólemin 2 ese ulǵaıtý, qaıta óńdeý ónimderiniń úlesin 70%-ǵa jetkizý máseleleri talqylandy.
«Bul mindetterdi oryndaý úshin mınıstrlik jol kartasyn ázirlep, kórsetkishterdi belgiledi. Memleket egis naýqanyn ońtaıly merzimde uıymdastyrý jáne ony sátti aıaqtaý úshin barlyq qajetti sharany qabyldady. Bıylǵy kóktemgi egis jáne oraq naýqanyna alǵash ret 5% jeńildikpen 400 mlrd teńge kóleminde qosymsha qarajat bólindi. «Nesıeler «Keń dala-2» baǵdarlamasy boıynsha bólinip, «Agrarlyq nesıe korporasııasy» AQ fılıaldary, nesıe seriktestikteri jáne ekinshi deńgeıli bankter arqyly júzege asyrylady», dedi Aıdarbek Seıpiluly.
Burynǵy qarjylandyrý kólemine «Keń dala-2» baǵdarlamasy boıynsha qosymsha 400 mlrd teńge tartý múmkindigi bar eken. Bul maqsatqa «Báıterek» UBH» AQ jelisi boıynsha 300 mlrd teńge tartylatyn kórinedi. Qalǵan qarajat kózderi de tabylǵan. «Keń dala-2» baǵdarlamasyna ótinishter 29 sáýirden bastap qabyldanyp jatyr. Búginde 600-den astam sharýa qojalyǵy jalpy somasy 46,6 mlrd teńgege ótinim qaldyrdy, bul 425 myń gektar egis alqabyn nesıemen qamtýǵa múmkindik beredi», dedi mınıstr.
Aıtýyna qaraǵanda, jeńildetilgen nesıeniń qosymsha kólemin qamtamasyz etý úshin qoldanystaǵy sýbsıdııalandyrý tetigine ózgerister engizilgen. Tarata aıtar bolsaq, birinshiden, sharýalar endi ósimi 5% ǵana bolatyn jeńildetilgen nesıeni paıyzdyq mólsherlemesin sýbsıdısııalaıtyn qarajatsyz-aq alýyna bolady. Demek buryn sharýa alatyn nesıesiniń ósim paıyzyn sýbsıdııalaıtyn bolsa, endi ondaı júkteme bolmaıdy. Ekinshiden, qaryzdy kepildendiretin jaǵdaıdy jaqsartý úshin qaryz somasynyń shartyn 85%-ǵa kepildendiretin tetik qarastyrylǵan.
Soltústik Qazaqstan oblysy