Isa Baızaqov atyndaǵy fılarmonııadaǵy sımfonııalyq orkestrdiń maýsymjabar konserti úlken anshlagpen ótti. Dırıjer Bolat Raqymjanov bul joly orkestr tizginin «Astana opera» teatrynan kelgen jas maestro Rýslan Baımurzınge usynǵan eken. Saz keshine dırıjer ózindik sán-saltanatyn ala keldi.
Sımfonııalyq orkestr bul konsertke tyńǵylyqty daıyndalǵany kórinip tur. Alǵashqy sátten-aq zalǵa lyq toly kórermendi klassıkalyq mýzykanyń qudireti bılep aldy. V.Mosart, I.Bah, A.Marchello, Dj.Rossınıdiń áıgili týyndylary oryndalyp, jurtshylyqtyń talǵamymen úılesip jatty deýge bolady. Eń áýeli mýzykanttar Dj.Rossınıdiń «Aljırdegi ıtalııalyq qyz» operasynan ývertıýrany oryndady. Bul operany Rossını nebári 21 jasynda, 23 kúnde jazyp, ıtalııalyq opera teatrynda kóshbasshy kompozıtor atanǵan. Ondaǵy ývertıýra ázilge toly, jandy, taqyryptardy almastyryp otyrýymen erekshelenedi. Týyndy óz zamanynda teatrlarda jyldam tarap, estradalyq konsertterde tanymal bolǵan. Al avtorǵa sol ýaqyttan bastap Mılan, Rım, Venesııa teatrlary esigin aıqara asha bastaıdy.
Keshtegi erekshe nómirlerdiń biri goboı aspabymen oryndalǵan A.Marchellonyń «Adagio» týyndysy boldy. Goboı aspabynda oınaıtyn astanalyq mýzykant Dámeli Mahpırova bul konserttik keshke arnaıy kelipti. Ol Fılarmonııanyń konserttik zalyndaǵy akýstıka talapqa saı ekenin, al orkestrdegi atmosferalyq aýan óte kreatıvti bolǵanyn jetkizdi. Konsertke kelgen kórermenderdiń erekshe yqylasy úshin rızashylyǵyn aıtyp, bul pavlodarlyq dırıjer Bolat Raqymjanovtyń jergilikti jurt arasyndaǵy bedeli men eńbeginiń nátıjesi dep baǵalaıtynyn atap ótti.
«Astana opera» teatrynan kelgen dırıjer Rýslan Baımurzın de sımfonııalyq orkestrdiń konsertinen soń alǵan áserimen bólisti.
«Kereký topyraǵyna dırıjer retinde tuńǵysh ret taban tirep otyrmyn. Bul jerdegi sımfonııalyq orkestrdiń ózindik baǵyty bar, ábden qalyptasqan ujym ekeni baıqalady. Maǵan orkestrmen jumys isteý unady, barlyq aspapshylar, ártister bilikti, kásibı turǵydan jetilgen. Ishekti aspaptar, úrmeli aspaptarda bolsyn, óte myqty oınaı biletin mýzykanttar bar. Kúrdeli shyǵarmalardy úlken úılesimmen ári sátimen oryndap shyqtyq. Jarqyn, mazmundy konsert ótti degen oıdamyn. Al Pavlodar qalasynyń ózi tamasha tabıǵat aıasynda, elimizdegi eń úlken Ertis ózeniniń jaǵalaýynda ornalasqan. Jergilikti mýzyka tyńdarmandaryna ónerimizdi baǵalap kelgeni úshin myń alǵys», dedi elordalyq maestro.
Aıtyp óteıik, Isa Baızaqov atyndaǵy oblystyq fılarmonııanyń sımfonııalyq orkestri bıyl qańtar aıynda Italııa jurtyn qýantyp qaıtty. Mýzykanttar Italııa jáne Albanııa orkestrlerimen birge 7 qalanyń kórermenine úlken konsert usyndy.
Pavlodar oblysy