Memleket basshysy byltyr Joldaýda ishki sý resýrstaryn únemdep paıdalaný óte mańyzdy ekenin atap ótti. Bul oraıda sýdy únemdeıtin ozyq tehnologııany engizý isin tezdetip, ony qoldaný aýmaǵyn jyl saıyn 150 myń gektarǵa deıin keńeıtý mindetteldi. Sý tapshylyǵy aıqyn seziletin Túrkistan oblysy Saýran aýdanynda únemdeý tehnologııasyn óndiriske engizýge basymdyq berilip keledi.
Aýdanda egistik pen baqshalyqty tamshylatyp sýǵarý jáne egistik jerlerdi jańa tehnologııamen jańbyrlatyp sýǵarý boıynsha aýyl sharýashylyǵy daqyldarynyń ónimdiligin arttyrý jumystary júrgizilip jatyr. Bul baǵyttaǵy jumysty jandandyra túsý maqsatynda Maıdantal aýyldyq okrýginiń uıymdastyrýymen dıqandarǵa kóshpeli semınar ótken bolatyn. Jıynda tamshylatyp sýǵarý tehnologııasynyń artyqshylyqtary jan-jaqty túsindirildi. Sý resýrstaryn tıimdi paıdalaný – agrarlyq salanyń damýyna jol ashatyn negizgi bastamalardyń biri. Aýdanda sý tapshylyǵy bolǵandyqtan, tamshylatyp sýǵarý tehnologııasy – taptyrmaıtyn múmkindik. Jańa bastama sýdy únemdeı otyryp, egin kólemin arttyrady. Semınar negizinde aýdan dıqandary tamshylatyp sýǵarý ádisiniń tıimdiligine kóz jetkizdi. «Aýyl sharýashylyǵy salasynda keńinen tarala bastaǵan tásildiń tıimdi tustary kóp. Tamshylatyp sýǵarý ádisiniń arqasynda aryqpen sýǵarylǵan jerlerge qaraǵanda astyq molyraq jınalady. Artyq shyǵyndy qajet etpeıdi. Sýdy únemdep, jumys kúshin qysqartady», deıdi «Aqsaq keriz» sharýa qojalyǵynyń tóraǵasy Nurjan Bekseıitov. Jańa tásildi egjeı-tegjeıli meńgergen dıqan aýyldyq okrýgten kelgen mamandar men sharýalarǵa tamshylatyp sýǵarýdyń joldaryn kórsetti.
Maıdantal aýyldyq okrýgine qarasty Yntaly eldi mekeninde ornalasqan «Aqsaq keriz» sharýa qojalyǵy 2022 jyldan bastap tamshylatyp sýǵarý tehnologııasyn iske asyra bastady. Sýarmaly egistik jerge alǵashqy jyly 6 gektar baqsha jáne 10 gektar kartop ekken. Baqshadan gektaryna 650 sentner eki ónim, al kartoptan 205 sentner ónim alǵan sharýa qojalyq qazirgi tańda sý qorynyń jyldan-jylǵa azaıyp jatqanyna oraı tamshylatyp sýǵarý tehnologııasyn odan ári damytýdy josparlap otyr. Bıyl 24 gektar jerge qarbyz jáne 1 gektar jer telimine qyzanaq, bolgar buryshyn ekken. Osy baǵyt boıynsha Shornaq aýyldyq okrýginde ornalasqan «Murat» sharýa qojalyǵy jylyjaı kesheninde tamshylatyp sýǵarý arqyly 0,75 gektar jerge qııar, 1,5 gektar aýmaqqa bolgar buryshyn egip, ósirip jatyr. Búginde jylyjaıdyń birinshi aınalymynan 25 tonna qııar ónimi alyndy. Aldaǵy ýaqytta 70 tonna ónim alý kózdelip otyr. Sharýa qojalyq kúnine 10 adamdy maýsymdyq jumyspen qamtıdy. Sondaı-aq tutynýshylarǵa ekologııalyq taza ónimderin usynyp keledi. Aýyl sharýashylyǵynda tıimdi tásildi keńinen qoldaný maqsatynda oǵan qajetti qural-jabdyqtar shyǵarý isi de qolǵa alynǵan. Mysaly, Shaǵa aýyldyq okrýgindegi ónerkásiptik parkte otandyq «BNK Group» BNK kompanııasy amerıkalyq «Nelson Irrigation» kompanııasymen birlesip, ótken jyly «BNK Irrigation» saýda belgisimen aınalmaly jáne frontaldy áreket etetin jańbyrlatqysh mashınalar óndirisin iske qosty. О́ndiristik tehnıka 3 myń sharshy metr aýmaqqa ornalastyrylǵan. Bul joba sý únemdeý tehnologııalaryn keńinen qoldaný úshin sý shashyratqysh mashınalardyń tolyq sıklin óndirýdi jolǵa qoıady.
Aıta ketelik, Túrkistan oblysynda 32 298 gektarǵa engizilgen sý shyǵynyn azaıtý tehnologııasy sýdy 2 ese únemdep, ónimdi 3 ese arttyrýǵa múmkindik berdi. О́ńirde ashylǵan sý únemdeý tehnologııasyn shyǵaratyn zaýyt jylyna 9 myń gektardy tamshylatyp sýǵarý júıesin óndiretin ekinshi kásiporyn bolmaq. Kásiporyn oblystyq bıýdjet esebinen Ordabasy, Saýran, Qazyǵurt, Shardara, Saıram aýdandaryndaǵy uzyndyǵy 100 shaqyrymǵa jetetin 9 sý nysanyna kúrdeli jóndeý júrgizedi. Nátıjesinde, 15 myń gektardan astam jerdi sýmen qamtamasyz etý jaıy jaqsarady.
Túrkistan oblysy